Online Reporter
NGIKHUMBULA indoda ezala mina yona esilele emathunjini omhlaba yayithi nxa isiya emsebenzini uthole igezile icwebezela, njalo ibobotheka kusobala ukuthi wayewuthanda umsebenzi wakhe.
Loba esevela emsebenzini, sasithi nxa simgijimela lodadewethu singamkhulumisa asiqhubele abuye ekuphethe siyekubeka endlini.
Wayengathwali imitshaqana eminengi, lezi nsuku kuvamile ukubona umuntu esiya emsebenzini esindwa yizijumba jumba uze ucabange ukuthi mhlawumbe ufuna ukudlula ephathisa ezilindweni zamabhasi kanti yizinto ayabe esiyazithengisa ngapha esemsebenzini.
Khona ungangena endaweni ezinengi lapho okusebenza khona izisebenzi zikaHulumende inengi ufica lizithengisela inkukhu, abanye ngabathengisa inhlanzi, amafiliziti, amaputi lokunye nje okutshiyeneyo.
Ungena kuleyo hofisi ufuna ukuncediswa uzaqala athengise ngemva kwalokho abe esekuncedisa.
Ungathi uyakhonona uzwa umuntu wakhona esekubalisela ukuthi usebenza okulingene iholo lakhe elincinyane njalo ngeke azibulala ngomsebenzi ngoba izinto kazihlangani.
Ukuba semsemsebenzini sokuyikucatsha ngomunwe, izisebenzi ezinengi zizenzela umathanda.
Ungakhangela ezikolo ezinengi impumela zakhona ziba phansi ngoba inengi lababalisi lithengisa. Kambe umfundi olikhasimende lakhe angamkhuza athini nxa engenzanga izifundo zangekhaya esesabela ukuthi uzakuyathenga kwabanye yena angatholi lutho.
Emisebenzini eminengi sekukompunzi idla emini njengezibhedlela ezinengi asisakhulumi, bayafa abantu abanengi isikhathi sabo singakafiki ngenxa yokuswelakala kosizo, ubusuzibuza ukuthi kusetshenzwani emsebenzini.
Ayixabene.
