Online Reporter
Innocent Kurira
INHLANGANISO yePremier Soccer League (PSL) isincome ukuphatheka kwayo embukisweni weZimbabwe International Trade Fair (ZITF) koBulawayo njengenyathelo elikhulu lokuqinisa ubudlelwano lokuthuthukisa ukukhula kwebhola lenyawo kuleli.
Umbukiso lo ugqitshwe ngempelaviki edluleyo.
Obambe isikhundla sikamaqhuzu wePSL uRodwell Thabe, uthe iligi isebenzise leli thuba hatshi nje ukubukisa lokho elakho, kodwa ukuxhumana ngqo labalandeli, amankampani lezinye ingatsha ezibalulekileyo.
“Inhloso yethu yikuthi sikhulise ubudlelwano bethu lezinye ingatsha emdlalweni webhola. Inguqu yethu ikusimo esithembisayo kwelakusasa,” kutsho uThabe.
Ugcizelele wathi bazimisele njengeligi ukuthi bengeze ukukholisa kwabalandeli lababukeli bemidlalo.
“Sifuna ukwengeza ubunandi enkundleni, kukholise abalandeli labo bonke esisebenza labo. Kumele sibe lobudlelwano obuhle lentatheli, sithembane sikholise umdlalo.”
UThabe uthe inkundla yeZITF ivumele iligi ukuthi iqoqe imibono evela kubalandeli labanye abaphatheka ngomdlalo. Uthe lokhu kuvuse imibono lamacebo angaphathisa ukubumba ikusasa lebhola eZimbabwe.
“Besilapha ukuzothola ulwazi, ubudlelwano lokuthi sikhulume lomphakathi mayelana ngebhola kuPremier Soccer League. Besifuna njalo ukukhankasa ngeligi yethu, siphe abalandeli bayo idlabuzane Ngesizini ka-2025 esiphakathi kwayo.”
I-PSL ichaze ukuthi i-ZITF yinkundla ebalulekileyo yokwabelana ulwazi kunye lokwakha ubudlelwano obungasiza ukukhulisa umdlalo.
