Online Reporter
WONKE umzali nxa ezele indodana ufisa ukuthi itshade izale abantwana ikhulise umdeni, ikakhulu abangobaba nxa ethe wazala indodana uyajabula abe manzi te ngoba esazi kamhlophe ukuthi usendo soluzakhula.
Ukuzalwa kwabantwana bomntwana ongumfana kutsho ukuba ibizo likababa ngeke libe lisafa liyohlala likhona. Ngaphandle kwalokho vele umuntu nxa ezitema uthi mina engizalwa ngumfoka Zibanibanyana etsho amagama aboyise labobabamkhulu bakhe.
Ngike ngalamula enye indaba akade isixege umdeni sekufungelwana ijoyi. Ngithe ngixazulula lindaba ngathola ukuthi sekuyinto evamileyo kumideni eminengi ukuthola umamazala engathandi abazukulu abazalwa ngumalukazana wakhe kodwa ethanda abazalwa yindodakazi yakhe.
Khona nxa ingendanga ingumazalela egumeni kumbe ibuye ekwendeni uthola engafuni lokuthi bathunywe benze imisebenzi efana lokuvalela imbuzi nxa kusemakhaya, nxa kusemadolobheni kungathiwa bahlakulele isivande uzwe esekhwaza ethi lingahluphi abantwana bomntanami.
Kungaba yindodakazi ekwazi ukunakekela unina ngokuthumela ekhaya, abantwana bakhona bavele baphathwe njengamaqanda lona elibanjwa ngezandla ezimbili kusesatshwa ukuthi umuntu lingamphunyuka lingavele lithi pha sokonakele.
Kumdeni lo okwakubangwa engikunanzeleleyo yikuthi umamazala uthanda abantwana bentombi ukwedlula abendodana yakhe ngesizatho sokuthi untombazana wakhe nxa ethumela imphahla isikhwama sohlobo lweTshangani bag sibuya sigcwele sithe phamu njalo sibhalwe ibizo lakhe abenguye ovulayo akwazi ukuthi uzazaba njani lezo mpahla.
Kukanti ngakolunye uhlangothi, inkinga ngezendodana yakhe zibuya zibhalwe ibizo lomkakhe onguye ovulayo esekamelweni lakhe lokulala baqale bazitike labantwabakhe andubana baphe omunye, kumcunule lokhu umamazala uzwe sephonguhlabela ingoma ezingazwakaliyo lamehlo esebomvu njengekhwezi, kuthi lomzukulu wendodana angafika azijikele endaweni zikagogo njengenjwayelo uzaqagwa ngempama kuthiwe uyangithunuka loba engalinyazwe lutho kuyinhliziyo ebuhlungu ngempahla esezivulwe ngumalukazana.
Phela abanye abaphenduka ekwendeni uthola belabantwana abahlanu obaba betshiyene begcinwa khona komalume. Omunye uyabe engowakoMoyo, Mpofu, Dube, Ndlovu loNcube kambe bonke laba nxa bengathi munye ngamunye unika umntanakhe amadola alikhulu eMelika lelizalela ekhaya liba yingamula lingathenga loba yini elifuna ukuyithumela ebantwaneni balo.
Minengi imideni exabana ixatshaniswa ngesiphatho esitshiyeneyo sabazukulu emakhaya khona obuye ekwendeni lingaba seGoli lithumele amakhumukhumu, abantwana balo abathintwa ugogo wabo uvuka ukeketani.
Okunye ngalaba abaphenduka ekwendeni yikuthi ngokuya kwesikhathi abanye babo bacina besenza ihlazo nxa sebekhanuka imvelo ngoba isikhathi esinengi bakhomba amadoda abanikazi. Ziphile nzima izimuli zaleyondoda ngoba iyabe ingasanakekeli imuli yakhe ngokugcweleyo.
Ayixabene.
