admin
Thokozile Mbedzi
KULAMASELA enkomo okulokhu kudingwa umkhondo wawo kulandela ukutshontsha inkomo ezingu-25 zelizweni leBotswana aqonda lazo eGwanda lapho afike abulala ezinye andubana abaleke atshiye ezinye sokuthungathwa umkhondo wawo.
Amasela la athutsha eqhuba inkomo lezi kumaviki ambalwa edluleyo esigabeni seNhwali khonale eGwanda.
Kuzwakale ukuthi inkomo lezi eziphilayo kanye lenyama yalezo ezasezihlinziwe zatshiswa ngoba kusesatshelwa umkhuhlane we-foot and mouth.
Esinye isakhamuzi sakulindawo uSimon Moyo uveze ukuthi ulesithuli ngendlela okwenzakele ngayo ngoba amasela la afike esigabeni abulala ezinye inkomo kodwa engakaqedi ahle ahlaselwa abaleka.
“Amasela la athi efika lapha abulala inkomo lezo ayezitshontshile, athe elokhu ephakathi kokwenza lokhu kwafika amapholisa abaleka.
“AbeVeterinary kanye lamapholisa bafika badubula ezazisele ziphila andubana azitshise zonke. Samangala ukuthi kungani bengasiphanga inyama sazidlela ngoba siphakathi kwendlala,” kutsho isakhamizi leso, uMnu Moyo.
Uthe babona angathi isenzo samapholisa kanye labeVeterinary sizathukuthelisa amadlozi esigaba ngoba inkomo yisifuyo esiqakathekileyo.
“Esintwini inkomo yisifuyo esiqakathekileyo kakhulu sibona angathi lokhu okwenziwe ngamapholisa lababona ngezifuyo kuzathukuthelisa amadlozi, kukanti thina lathi kasikuzwisisi ukuthi kwenzelwani lokho,” kuchaza uMnu Moyo.
Esinye isakhamizi uNkosazana Kiratilwe Manaka uthe kakuzwisi ukuthi kungani kwenziwe isihluku ngoba bona inkomo bayibona njengesifuyo esiphezulu kwazo zonke izifuyo njalo esihloniphekayo.
“Mina ngokwazi kwami inkomo yisifuyo esihloniphekayo kakhulu kulazozonke izifuyo ngoba loba sisenza imikhuba yesintu inkomo siyayisebenzisa ngakho ukuthi zibulawe okulesihluku kangaka akuthabisi lakancane.
“Kufanana lokuchitha igazi lomuntu ngoba lanxa ibulawa inkomo umninimuzi kamane ayihlabe nje kodwa uyabiza amanye amadoda angomakhelwane bamncedise. Amapholisa sathi siwabuza athi yikho okumele bakwenze lanxa singayizwisisi ingcazelo yabo,” kulandisa uNkszn Manaka.
UDokotela wezifuyo esabelweni seMatabeleland South uDokotela Enat Mdlongwa ebuzwa ngodaba lolu uvumile wathi konke abakwenzileyo bakwenze ngoba bevikela uzulu wakuleli njalo lenkomo lezi asozakuleli.
“Udaba lwenkomo ezitshontshwe eBotswana kwatholakala ezinye sezihlinziwe ngamasela lwenzakele sibili kungakho thina inkomo lezi kayisizo zethu ngokunjalo asazi ukuthi khonale ezivela khona bezilomkhuhlane bani ngakho ngumthetho ukuba kumele zitshiswe ukuze sivikele uzulu.
“Lalapho ezivela khona labo bayazivikela ngokufananayo ukuba bengatholi imikhuhlane mhlawumbe lakho ngapha zingabe zithole umkhuhlane.
“Kungakho zihle zatshiswa zonke lezo ebeziphila lezabulawayo ngamasela. Sihlose uvikela uzulu ngaso sonke isikhathi ukuba angadli ukudla okulemikhuhlane,” kulandisa uDkt Mdlongwa.
Online Reporter