admin
Silo Mehleli Sibanda
MANENGI amagama aphiwa abantu abahlala kweleMzansi, eJozi, ajonge ukuchothoza, uzizwe lawe ungakhululeki emoyeni ngoba uphathwa okwesichaka. Baphiwe amagama afana lokuthi aMakwerekwere, amakirimani, amazizimbane, abantu bokufika.
Ungadingisisa ingcazelo zalamagama uzathola ukuthi ayethusa, atsho nje okuyinto, lesigcabha size sibe ngcono ngoba nxa kuthe kwawohloka elikazamcolo wesulela udaka lwenyawo kiso ungakangeni exhibeni kumbe emkulwini.
Kulusizi ngoba kuthe kuvela limpihlimpihli kwachitheka igazi, abanye balahlekelwa yimiphefumulo.
Phela inengi loluntu lwaseMzansi ukubulala umuntu abakutshayi ndiva bakwenza into elula. Bagongoda umuntu ngembokodo zamatshe, angani batshaya imamba elophaphe ekhanda, ebonakale duze lalapho okufele khona ujamluti, kucatshangelwa ukuthi yiyo emlumileyo.
Bayagqokisa umuntu amathaya bathele uphethulo atshe angqongqe umuntu, afe ebongolela, sokungani lithokazi lembuzi eliqala ukuzala.
Abanye ngabajikwa ezitezi ezinde okwamagama adaklazeke phansi umuntu ufice sekuzimfucufucu, ubuchopho bomuntu bugcwale phansi, uthole angani yiphophukhoni ehazwe emtshadweni.
Ufice bona bekholisa, lonembeza ungathi abaselaye. Kumbe mhlawumbe bafundiswa ngamabhunu ngesikhathi sobandlululo. Bantu beZimbabwe laziwa ngokuhlonipha lokumesaba uMvelinqangi, lingaphindiseli, bhekisani amabombo emuva like lizokhokha umoya, lithathise kakutsha.
Akusizi ukuthi uphikelele uthi ngoba ufuna ukugcina umsebenzi yona impilo yakho isengozini. Umsebenzi uyadingwa uthole omunye, kodwa umphefumulo ungaphuma, uphumile, sutshiyela abantu izinsizi.
Loba nje isimo sezomnotho singamanga kuhle ekhaya, kodwa kungcono ngoba ulala behle, uzinakanela ukuthi uzakudlani kusile, ubusukhanda amasu okudinga imali kungela mpazamo.
Ungaphindisela ubulale kuzakuhlupha okwempilo yakho yonke, loba nje ungathi ubuzivikela. Kwabo kagwala akula sililo, etshatha imitshaqana yakho ukhumbule ekhaya, litshiyane lezikliwi lemidodovu yezigebenga, engani zetheswa inkanda ngegazi.
Ayixabene
Umlobi uthinteka ku0714355641
Online Reporter