admin
Ethel Ncube
KUDABA oluhlasimulisa umzimba kulosane oluleminyaka emithathu oluganyulwe ngamazenge abethethwe lizulu lwafa kukanti omunye umbalisi ulaliswe esibhedlela njalo usesimeni esibi.
Imbedumehlwana le yenzakale esikolo seKomba eLupane ngempelaviki edluleyo lapho izindlu zokufundela zonke, ezababalisi kanye lezambuzi ezathathwa khona uphahla.
Kuzwakale ukuba uphahla lwendlu kambalisi lwathathwa lizulu kungakho wasebaleka labantwana esiyacatsha kwenye indlu lapho abahlangana khona lengozi le.
Ekhuluma loMthunywa omunye wezakhamizi zeLupane uNkosazana Ellyn Dube uveze ukudana ngesehlakalo esitshiye izakhamizi labafundi ziphakathi kosizi.
“Umbalisi lo waphuma endlini yakhe isithethwe luphahla labantwana lapho abafika basikwa ngamazenge. Ngokuswelakala kwenhlanhla lo omncane ofunda uGrade 1 wahle wasweleka, kukanti unina ongumbalisi usesimeni esibi, lo omunye walimala kodwa kakho engozini,” kutsho uNkszn Dube.
“Akulanto eseleyo, ababalisi basele egcekeni, impahla lokudla kunethiwe sidinga uncedo ukuthi isikolo silungisiswe.
“Sizwa ubuhlungu kakhulu ngoba akulalutho oluseleyo sibi samabhuku konke konakele kulesisikolo. Sicela abakhululekileyo baphathise abantwana lababalisi ukuze abantwana bafunde,” kubika uNkszn Dube.
Iphephandaba likazulu lixhumane loDistrict Schools Inspector weLupane uMnumzana Lovemore Ncube ovumileyo ukuba kube lomonakalo esikolo lesi.
“Umonakalo lo wenzakale ngeSonto ngezikhathi zemini yantambama lapho izulu elibhidlize yonke impahla yesikolo ebalisa izindlu zokufundela zonke, izindlu zababalisi kanye lezambuzi konke kusele kungelaphahla.
“Izingwalo zonke ezokubala lezokubhalela kusele kulilambazi ngezulu kanye lekhompuyutha, okuseleyo nje esikolo lesi yisivande. Khathesi bahlezi ezindlini ezingelaphahla ngikhuluma nje. Konke sokuyikuqalisa kutsha, akulalutho oluseleyo.
“Silusizi ngoba kutshone umntwana oyedwa ongumfana ongumntaka mbalisi walesisikolo. Umbalisi lo ulimele kakubi, ulalisiwe esibhedlela ikanti lo omunye umntwana oyinkazana ulimele kodwa kakho esimeni esibi,” kuchaza uMnu Ncube.
Online Reporter