adminBAZOTHOLA ingqayizivele yethuba lokuzithengisa emaqenjini phetsheya kolwandle abadlali abadabuka ngaphandle kweSouth Africa.
Kuzakuba lithuba kodwa abagijima kuPremier Soccer League (PSL) amazwe abo azibekisele indawo kuCaf Africa Cup of Nations (Afcon) ngonyaka ozayo eGabon.
Imiphumela yemidlalo yokuhlunga egijinywe kule mpelasonto iqinisekise amazwe angu-16 azibekisele indawo ku-Afcon. Amazwe azobanga indawo kulo mqhudelwano yiGabon engosokhaya, Ivory Coast evikela isicoco, Morocco, Senegal, Egypt, Ghana, Guinea Bissau eqalayo ukudlala kulo mqhudelwano, Zimbabwe, Mali, Uganda, Burkina Faso, Tunisia, DR Congo, Togo neCameroon.
I-Afcon izobe ithanyelwa yinqwaba yamaqembu aphesheya azobe ebuka abadlali bawo abazobe bebambe iqhaza kulo mqhudelwano. Izoqala ngo-15 Januwari iphele ngo4 Febhuwari. Amazwe azoqhathwa ngo-19 Okthoba, eLibreville, eGabon.
Abadlali bePSL abangase bathole ithuba lokuzidayisa emaqenjini aphesheya nguTendai Ndoro we-Orlando Pirates, Willard Katsande weKaizer Chiefs, Khama Billiat weMamelodi Sundowns, Cuthbert Malajila weBidvest Wits, Onismor Bhasera noKingston Nkhatha beSuperSport United, bese kuba uKudakwashe Mahachi noDanny Phiri beLamontville Golden Arrows bonke abayibamba eqenjini lesizwe laseZimbabwe.
Abanye abadlali amazwe abo azodlala ku-Afcon ngoJanuwari futhi abebekhona emidlalweni yokuhlunga ngu-Issa Sarr wePirates neSenegal, u-Edwin Gyimah noBernard Morrison bobabili abadlala kweZimnyama naseqenjini lesizwe laseGhana, uGeoffrey Massa weBaroka FC noDenis Onyango weSundowns bobabili abadlalela i-Uganda noDove Wome weSuperSport neTogo.
Nakuba kungezona izindaba ezimnandi kubantu baseNingizimu Afrika ukuthi ngeke babone ababo abadlali kulo mqhudelwano kodwa lesi sililo asigcini lapha eMzansi kuphela kwazise amazwe afana neNigeria neZambia azoyibuka kuthelevishini i-Afcon.
Ukungaphumeleli kwala mazwe athathwa njengezikhondla khondla zase-Afrika futhi anomlando wokudla isicoco se-Afcon kuzoncisha abathandi bebhola ukubona abadlali abafana noJohn Obi Mikel noVictor Moses bobabili abasemabhukwini eChelsea.
Bakhona nabadlali abafana no-Ahmed Musa weLeicester City kanti ngeke babonakale nabadlali abajwayele ukuyishukumisa i-Afcon njengoStophila Sunzu noReinford Kalaba bobili abebekhona iZambia idla i-Afcon eminyakeni edlule.
Kukhalwa ngezethenjwa ezingeke zibonakale nje kodwa amaqembu afana nayo iLeicester, Manchester United, West Ham United neManchester City azoba nenkinga uma sekuqala lo mqhudelwano ngoba uReyard Mahrez no-Islam Slimani abadlalela ompetha base-England (Leicester) ngeke babe khona.
KuManchester kaJose Mourinho kuzohamba u-Eric Bailly kanti uPep Guardiola kuzomele adlale ngaphandle kukaYaya Toure vele akhombisa izimpawu zokungamdingi. KuSlavan Bilic inkinga kuzoba ukudlala ngaphandle kuka-Andre Ayew, Diafra Sakho noSofiane Feghouli. — Ubulembu
Online Reporter