Online Reporter
Nkosilathi Sibanda
IZAKHAMIZI zeMguza, eMatabeleland North sezizathola usizo olungcono lwezempilakahle ngemva kokuvulwa kweKennebec Clinic, okulinyathelo elikhulu elisekela umbono kaHulumende weVision 2030 wokuletha impilo engcono ebantwini bonke.
Ikilinika le, ephethwe yikhansili yeMguza Rural District Council, ivulwe ngokusemthethweni nguMphathintambo obona ngokwenzakala esabelweni seMatabeleland North uRichard Moyo ngoLwesibili.
Uveze ukuthi uHulumende uyaqhubeka esakha indawo zempilakahle ukuze wonke umuntu athole usizo olusezingeni eliphezulu.
“Ukuvulwa kweKennebec Clinic kutshengisa ukuzimisela kukaHulumende ekuletheni usizo lwezempilakahle eduze kwabantu. Lokhu kuhambelana lombono weSecond Republic loVision 2030 wokuthi kungabi lomuntu osala emuva ekutholeni usizo lwezempilakahle,” kutsho uMphathintambo uMoyo.
“Siqhubeka sisakha indawo eziphucula impilo zabantu njalo zikhuthaza intuthuko emaphandleni.”
Ikhansili yeMguza Rural District Council ithe ukwakhiwa kwekilinika kwenzakale kulandela ukusebenzisana phakathi kukaHulumende, ikhansili labanye abasekeli bentuthuko.
Kumbiko wayo, ikhansili ithe ukuvulwa kwekilinika le kuyinxenye yemizamo yokuqinisa indlela yokulethwa kwemisebenzi kaHulumende, ukuthuthukisa ezempilakahle
Ibonge bonke abancedise ekwakhiweni kweKennebec Clinic, isithi ukusebenzisana kuqhubeka kuletha intuthuko eMguza lokusondeza ilizwe ekufezeni inhloso kaVision 2030.
