Blessing Chizhande
IZOLO thina sisakhula, kwakuthi kungabonakala imota yamapholisa esigabeni kumbe umpholisa ehamba etsholobela kwakuzadingisiswa ukuthi bekulandwe bani wakobani njalo uwoneni.
Abaziwa ngokuganga bahle bavele bacatshangelwe ikakhulu labo abaziwa ngokuthiya, kwakungavamanga ukubotshwa kwabontanga, kwakuvame ukubotshwa abantu abadala lakho ngemva kwesikhathi.
Wawuthi nxa ulijaha kungezwakala ukuthi ube ubotshiwe lamantombazana ahle akwenyanye, uthi ukhombisa lo akhangele le bangakulaleli ufice kungani ugcobe amagcobo anuka okweqaqa.
Labazali bentombazana nxa besizwa ukuthi umntanabo uke wabonakala exoxisana lesigilamkhuba babezonda bathathe umntanabo bamuse kuyisekazi owendele khonale komnyama ubambile emaguswini bezama ukulahlisa umkhondo.
Manje ontanga bakulezinsuku bathi ungabona ungakaze ubotshwe impilo awukabi yazi, ufica bezigqaja ngokuthi uphuma ejele.
Lamantombazana uthole bejabula nxa besizwa ukuthi uzibani banyana uphuma entolongweni kumbe nxa ethe wadlephana labo mthetho.
Ngike ngahambela enkantolo yedolobho lakithi ngiphelekezela omunye umngane wami akade esiyafakaza okwangizwisa ubuhlungu yikuthi amacala amanengi ayedalwe ngabantu abaleminyaka engaphansi kwetshumi lambili lanhlanu, eyiyo iminyaka esikhangelele ukuthi abantu bakhona babe semakolitshini kumbe befundela imisebenzi ngoba nanku lengqondo zabo zisesebukhali ziyabamba njalo lamandla baseselawo.
Ungavele ubone usugudlana lomthetho lokhakhayi lungakaqini yazi ukuthi uhambo lwakho lwempilo luzakusinda phambili, ngaze ngakhumbula omunye umfundisi webandla lami wayethi nxa sihlangene abafana lamankazana, athi mantombazana lingavumi ukuqonyiswa ngumuntu ongakhonziyo ngoba ethwele amadimoni. Sakhula sibambe lowo mthetho.
Abakhathesi ngenxa yokungesabi umthetho bayazihohobisa izalukazi betshiya osowabo.
Ayixabene
Online Reporter