Online Reporter
Abafundi be-Edward Phatudi Secondary School e-Atteridgeville, eTshwane, eSouth Africa, bathi isikhova lamagundwane afileyo zimpawu zokuthi isikolo siphansi kwethunzi elimnyama.
Bakholelwa ukuthi lokhu kungabe kuhambelana lokufa kwabanye abafundi esikolo.
Bathi u-2026 ubungumnyaka obuhlungu kakhulu kubo ngemva kokulahlekelwa ngabafundi esikolo.
“Siyacela abelaphi bezomoya ukuthi beze basisize. Sesisesaba ukungena emagcekeni esikolo, njalo kunzima kakhulu ukungena emakilasini,” kutsho omunye umfundi.
Umfundi webanga lika giredi 10 uthe babona isikhova phezu kophahla izikhathi ezinengi.
“Isikhova lesi siyasethusa lapho singena emakilasini. Asikholwa ukuthi siyinyoni nje kuphela; sisola ukuthi singabe siyisikhova esihambelana lomoya omubi,” kutsho yena. Uthe okwenzakala esikolo kuyamangalisa njalo akujayelekanga.
“Sesicabanga ukuthi kungenzeka kube ngumoya omubi osihluphayo,” kutsho umfundi.
Omunye umfundi webanga lika giredi 11 uthe:
“Sihlutshwa ngamagundwane angajayelekanga. Amanye siwathola efile. Siyacela abelaphi bezomoya ukuthi beze bazohlambulula isikolo sethu. Siphila ngokwesaba njalo sesikhathazekile.”
Omunye umzali uSelina Mahlanga uthe:
“Lesi sikolo sidinga imikhuleko eqinileyo. Sibuhlungu kakhulu ngoba abantwabethu bayafa kulesi sikolo. Ngicela abesifazane beze bazokhuleka kuNkulunkulu ngalokhu kuhlaselwa esikholwa ukuthi kubi.”
Omunye umzali, uRose Malatsi, uthe bafuna loludaba luxazululwe.
“Abantwabethu bahlala begula, njalo kasizwanani lomphathi wesikolo. Sifuna ukuthi umphathisikolo asuke,” utsho njalo.
U-Lesego Mhlanga, umkhokheli wentsha kuWard 68 njalo ongumsunguli we-Next Gen Youth Development, uthe bacabanga ukuthi kungenzeka kube yikudla okonakeleyo okubangele ukufa kwabafundi.
Uthe ukudla okusemagabheni osekuphele isikhathi kwatholakala kulahliwe.
“Siyasekela izikhalazo zabafundi. Kulobunzima bokukhulumisana phakathi kwabazali lesikolo,” kutsho yena.
Umphakathi labazali baba lomhlangano esikolo ngeviki edluleyo ngemva kwezinsolo zokuthi abafundi bayaqhubeka besifa esikolo.
UNomthandazowethu Ndhlovu (16), owayengumfundi kulesi sikolo, wafa esikolo ngoMvulo mhlaka 27 Ntulikazi 2026. Umdeni wakhe uthe udabukile kakhulu ngokulahlekelwa kwakhe njalo awenelisi ukuphawula kabanzi ngodaba lolu.
Umelaphi wendabuko, uDokotela John Sithole, uthe isikolo kumele sibize abelaphi bezomoya ukuze bazohlambulula indawo.
Okhulumela ugatsha lweMfundo eGauteng, u-Onwabile Lubhelana, uthe umnyango uyazisola njalo udabukile ngokudlula emhlabeni kwabafundi kulesi sikolo. — Ubulembu
