Online Reporter
Nkosilathi Sibanda
UMSEBENZI wokuvuselela iNengasha Stadium esedolobheni leHwange usuqalile, ngenhloso yokuthi ibe yindawo yezemidlalo lemisebenzi yomphakathi esezinengi eliphezulu.
IHwange Local Board, abanikazi benkundla, ibeke umbiko mayelana ngokusungulwa komsebenzi wokwakha kakutsha inkundla le. Ithe ihlose ukuthi inkundla le, eselokitshini leMpumalanga, ibe yindawo yezemidlalo ezaphakamisa abadlali, abalandeli lomphakathi.
Kubikwa, ikhansili yeHwange, kumaviki adluleyo, isebenzisane lengcitshi ze-physical planning ukuhlola okuthile, andubana kuqalwe umsebenzi.
Ukuvuselelwa kweNengasha Stadium kukhangelelwe ukuthi kunikeze ezemidlalo eHwange umfutho omkhulu, ikakhulu ibhola lenyawo, njalo kuvulele abasakhulayo amathuba okuthuthukisa iziphiwo zabo.
Inkundla le izaphinda ibe yindawo lapho imidlalo emikhulu ezaqhutshelwa khona, ngesikhathi umphakathi usuthola indawo engcono ongazigqaja ngayo, ngokutsho kwesikhulumi seHwange Local Board uDumisani Nsingo.
“Umsebenzi wokulungisa iNengasha Stadium uyingxenye yemizamo yokuthuthukisa indawo zikazulu ezingaphansi kwekhansili yethu, ezigoqela inkundla zemidlalo. Le yinqubekela phambili ebonakalayo njalo ekhangelelwe ukuthi ibuyisele impilo lenkazimulo enkundleni le,” kutsho uNsingo ekhuluma lephaphandaba likazulu ngoLwesithathu kuliviki.
INengasha Stadium ibilikhaya lamaqembu enguqu amanengi ayedlala ku-ZIFA Southern Region Division One lakwezinye izigaba eziphansi.
Amaqembu ayesebenzisa inkundla le, abalisela iMakomo FC, iqembu elaliphethwe yinkampani yezimbamgodi zamalahle iMakomo Resources. IMakomo FC yayisebenzisa iNengasha njengekhaya layo emidlalweni yeSouthern Region Division One njalo yayifaka isandla ekulungiseni inkundla. I-
DRC United, ngelinye iqembu leHwange elalikuDivision One, elalisebenzisa inkundla efanayo.
Amanye agoqela iMpumalanga FC, iqembu elaphiwa ibizo lelokitshi lapho okulenkundla le, Rufaro Rovers, Blackboots, Nengasha Stars, Technosphere lamanye amaqembu enguqu yokuzilibazisa.
Ukusetshenziswa kwenkundla le ngamaqembu la kutshengisa indima enkulu eyake yadlalwa yiNengasha Stadium ekuthuthukiseni inguqu eHwange lasesabelweni seMatabeleland North.
Ngokuvuselelwa kwayo, inkundla le ingaphinda ibe yindawo lapho amaqembu eHwange angaphatha khona imidlalo, abadlali abasakhulayo bathuthukise iziphiwo zabo, njalo umphakathi uthole indawo yezemidlalo ongazigqaja ngayo.
