Online Reporter
Nkosilathi Sibanda lo-Innocent Kurira
UMDLALI wamaWarriors uMarvelous Nakamba usebonge abalandeli bamaWarriors ngokusekela iqembu lanxa lehlulwe nge-2-1 yiDemocratic Republic of Congo (DRC) emdlalweni wokudinga indawo kumqhudelwano we-Afcon ka-2027 ngoMvulo.
AmaWarriors anqotshwe okokuqala kuGroup E emdlalweni obuseNational Sports Stadium eHarare, okutshiye iZimbabwe ilemiklomelo emithathu emidlalweni emibili.
Lanxa iqembu linqotshiwe, uNakamba uncome abalandeli ngokuma leqembu njalo wabancenga ukuthi baqhubeke ngosekelo kumidlalo ye-Afcon ka-2027.
“Siyabonga kakhulu Zimbabwe. Usekelo lwenu lwabayinsika njalo siyaziqhenya ngalokhu.
Sizaqhubeka sisebenza nzima ukuze siphakamise ifulegi yethu. Ukubambana kwethu kuqakathekile,” kutsho uNakamba, kukhasi lakhe le-Instagram ngoLwesithathu emini.
AmaWarriors aqale umkhankaso wawo ngokunqoba iSierra Leone nge-3-2, kodwa ehluleka ukuphinda lokho ngesikhathi ebhekane leDRC.
Kusenjalo, kulandela umdlalo lo, kusuke kwaba lensolo ngabonozinti bamaWarriors?
Unozinti u-Elvis Chipezeze usolwe kakhulu kumdlalo wangoMvulo ngokwenzakale emdlalweni.
Kuyacaca ukuthi indawo yabonozinti idinga ukukhangelwa kakhulu.
Ibhola kalisebenzi ngendlela yokuthi umdlali oyedwa abekwe icala lakho konke, kodwa unozinti yindawo lapho iqembu leZimbabwe elingeke likwazi ukuba lomzwangedwa.
AmaWarriors adinga ukuncintisana okuqinileyo phakathi kwabonozinti.
I-DRC yajezisa iZimbabwe ngesikhathi ithola amathuba ayo, lanxa amaWarriors azama ukubuyela emdlalweni ngebhola likaMarshall Munetsi. Ibhola leli lafika ekupheleni komdlalo, sekusele isikhathi esincane ukuthi iqembu liguqule impumela.
Ensukwini ezedluleyo, amaWarriors ayetshengise umoya wokulwa ngesikhathi edlala umdlalo wawo leSierra Leone, esuka ku-2-0 esiyanqoba 3-2.
Lokho kwatshengisa ukuthi iqembu liyenelisa ukulwa, kodwa umdlalo weDRC wona uveze ukuthi kusekhona okumele kulungiswe. Indawo yabonozinti ingenye yezingxenye okumele ithole ukunanzwa kakhulu.
UMongameli Emmerson Mnangagwa, wayebukele njalo yena wagxila kokuhle okwenziwa liqembu.
UMongameli wancoma abadlali ngokuzimisela kwabo. Wabonga njalo inkulungwane zabalandeli abagcwalisa inkundla.
AmaWarriors azabuyela emsebenzini ngoLwezi lapho ezabhekana le-Equatorial Guinea kweminye imidlalo yeGroup E.
