adminYiNtatheli kaMthunywa
KUHLOHLWE amabhola eyedlula amatshumi amathathu kumidlalo yakuqala yenkezo yeTownshend and Butcher edibanise amaqembu angaphansi kweBulawayo Amateur Football Association kuliviki.
Inkezo le isidlalelwe ngamathimu akoNtuthu okweminyaka engu-59 njalo sekubikwe ukuthi imidlalo yayo yomnyaka ozayo izahlabusa okwedlulisileyo ngoba umsekeli wayo usethembise izimanga.
Phakathi kwamaqembu alitshumi lasithupha, kudliwe amanye kwasala ayisitshiya galombili abalisa iMadamara, iUnity Village, iCrusaders, iRebels, United FC, iSafeguard, iLaduma leMpilo United.
Amaqembu azadibana kusigaba sama-quarter-final.
Kumidlalo yakuqala, amaqembu eChronicle NGA lele-Mpilo United atshiye ababukeli bengelankani ngenani lamabhola ahlohlwe kulumdlalo. Ngemva kwemizuzu engu-90, umdlalo uphethe ungutshiki lobhanqa 2-2, anduba iMpilo inqobe 13-12 kumbekwa.
Loba abasekeli balinkezo bengakhululekanga ukuveza umvuzo, baqonqosele ukuthi lonyaka kuzakubangcono kuleminyaka edluleyo.
Umgcinisihlalo weBulawayo Amateur Football Association uChris Mtungwazi uthe inhloso yabo yikuthi bakhuthaze uzulu wakoBulawayo ukuthi aphatheke kwezemidlalo. Ubonge usekelo abaluthola kuTownshend and Butcher wathi lokhu kuzaletha ingqobe kwamanye amankampani.
“Iligi yeBulawayo Amateur Football ibika ngokuthaba okukhulu ukuthi siyaqhubeka ngenkezo yethu eyeTownshend and Butcher. Inkezo le iza ngesikhathi amathimu ethwele nzima ukuhlanganisa imali lokuzimisela ukudlala kungelalutho.
“Khathesi inkezo enjengale izavusa amehlo amathimu ahlakaniphe, akwazi ukuthi adlalela umvuzo.
“Sibonga wonke amathimu aphatheke kulinkezo, lalawo asenqontshiwe ngoba abeyinsika yokuvuselela ukuncitisa kuligi yethu,” kutsho uMtungwazi.
Umsekeli kamgcinisihlalo uCharles Chunda wengezelele ngokuthi:
“Nxa sikhangelisisa, inguqu yobungane ayilangitsho usekelo. Amathimu athwele nzima ukuthi enelise ukugcwalisisa imidlalo yawo ngenxa yendleko ezikhona kunguqu.Inkampani yeTownshend and Butcher isilathi okweminyanga engu-59 njalo ifuna ukunceda umphakathi ngokuphakamisa abadlali lamathimu enguqu yobungane.”
“Inguqu yobungane ikhuthaza abadlali ukuthi banakekele impilo zabo lokuthi banikeze umzekeliso kwabasakhulayo,” kuphetha uChunda.
Online Reporter