Online Reporter
Lovemore Dube
KUBE yinjabulo enkulu kubathandi bomdlalo we-volleyball edolobheni leHwange ngesikhathi besizwa ukuthi umqhudelwano weZimbabwe Open Volleyball uzadlalelwa kulindawo.
Imidlalo kubikwa izaqalisa mhlaka 3, kusiya kumhlaka 5 Mabasa.
UMxolisi Ndlovu, umongameli weZimbabwe Volleyball Association (ZVA) wazise iphephandaba likazulu ngodaba lolu ngoMvulo.
Inkezo le ngeyakuqala lonyaka njalo incintiselwa ngamaqembu amakhulu elizweni.
Kuyaqala ngqa ukuthi kube lomdlalo walelibanga esabelweni seMatabeleland North njalo kukhangelelwe ukuthi imidlalo le ithuthukise ithalenta esabelweni.
Bekuyimvama ukuthi imidlalo le ihanjiswe koBulawayo, eGweru, eHarare leMutare amadolobho amakhulu kodwa sekutshintshile njengoba kulenhlelo zokuthi lezinye izabelo zithole ithuba elifanayo.
“Lonyaka sithe umdlalo lo ubeseHwange. Lokhu kuzenza abantu bakulindawo babone i-volleyball ephakemeyo njalo kuzakhulisa umdlalo lo. Sifuna ukhule iZimbabwe yonke njalo okuwukhulisayo yikuthi sihambise imincintiswano ebantwini,” kutsho uNdlovu.
UWilliam Banda okhokhele imizamo yokuthi imidlalo le iqhutshwe eHwange uthe okwenziwe yiZimbabwe Volleyball Association kuyancomeka. Kusukela ngo1985, uBanda lokhe ekhankasela ukukhula komdlalo eHwange.
Ngesikhathi sobutsha bakhe udlalele iHwange Grizzlers eloMailos Ncube owazakhela ibizo edlalela iBulawayo Raiders leZRP Raiders. Omunye kwakunguBuga Nyamambi owadlalela iHighlanders Volleyball Club.
UBanda uthe abantu beHwange bajabule kakhulu njalo kukhanya amalanga omncintiswano asebaphuzele ngoba balesifiso sokuthi imidlalo iphumelele njalo ibukelwe ngabantu abanengi.
“Siyawamukela lumbiko wokuthi sizakuba lemidlalo emikhulu. Njengabalandeli labathandi balumdlalo we-volleyball, siyathokoza ukuthi iZimbabwe Open lonyaka iqhutshwa kithi. Abantwana, abadlali lomphakathi bazabona i-volleyball ekwelinye izinga,” kutsho uBanda.
Ukuza kweZimbabwe Open kuzavulela abasakhulayo amathuba. Ezokugijima, uqaga lenguqu yiyo imidlalo ephuma phambili eHwange.
