Online Reporter
Nkosilathi Sibanda
AMALOKITSHI eCowdray Park leMganwini koBulawayo ayakhula ngakho kudingeka ukuthi kwakhiwe izindlu ezinengi lokunye okuphathelane lempilakahle yabantu.
Ngenxa yokuthi indawo lezi sezithethe umhlabathi omnengi, kungumbono wekhansili yakoBulawayo kunye loHulumende ukuthi kwakhiwe izitezi ezihlala abantu okungaba licebo elihle.
Endaweni yokuthi kwakhiwe izindlu ezilandelanayo “ezingumdadada” kubikwa ama-flats engaba linyathelo elilakho ukwenza kubelula ukunika abantu indawo yokuhlala etshiphileyo, elenhlelo zakulezinsuku.
Umqondisi wogatsha lwe-Housing and Community Services uMnumzana Dictor Khumalo uthe idolobho liyakhula nanko bathole inhlelo zezakhiwo ezitshiyeneyo ezifika 274 ngoMbimbitho lonyaka. Uthe bathole ama-plan ezindlu zokuhlala angu-186, lawamabhizimusi ayisitshiya galombili (19) ezakhiwo zomphakathi.
“Kolunye uhlangothi, ama-plan ezakhiwo ezingu-214 ezibiza i-US$5 046 442 ethulwa ngoMbimbitho lonyaka. Lokhu kutsho ukuba kubelokwenzwa kwe-7,94 phesenti nxa kuqathaniswa lenyanga edluleyo. Ugatsha lwenelise ukuthi luthole i-US$50 464,42 ngokubiswa kwama-plan,” kutsho uMnu Khumalo, kumbiko ophume ekhansilini kuliviki.
Uthe ikhansili yenelise ukuhlola izakhiwo ezingu-1 483, okube lokwengezwa kwe-33,6 phesenti kusukela ngoNhlolanja.
“Ekuhloleni kwethu, kube lezakhiwo ezingu-48 ezaphiwa izithupha zokuthi zisetshenziswe. Ezingu-24 sezabhidlika zahlolwa kutsha njalo lalezo ezisetshenziswa ngumphakathi zahlolwa. Kwatholakala ingafika i-US$9 180 ivela ekuhloleni izakhiwo.”
Kusenjalo, logatsha lweLocal Government Public Works and National Housing kuHulumende lwabika phambilini ukuthi lufuna ukwakha ama-flat eCowdray Park laseMganwini. Ugatsha lolu lwabika ukuba ludinga umhlabathi ongaba yi-16 434 hectares in Emganwini le-14 248 hectares eCowdray Park.
