Online Reporter
Lovemore Dube
KUZATSHEKA ibhetshu ngoMgqibelo mhla amaqembu atshisayo iBulawayo Chiefs leNkayi United engqikilana kumdlalo weligi yeZifa Southern Region Division One.
Zombili yizo eziphezulu njalo ezikhanya zilethuba lokuthi zingaphumelela ukuthi ziyedlala kuCastle Lager Premiership kumnyaka ozayo.
Zizadibana eWhite City Stadium njalo kukhangelelwe ukuthi kuzakuba lababukeli abanengi njalo abadlali bazazama ukutshengisa ukuthi ukuba lemiklomelo eminengi akusinhlanhla kodwa kuyimbadalo yalokho abakwenza enkundleni.
IBulawayo Chiefs ikhokhela ngemiklomelo engu-57 ilandelwa yiNkayi United ele-54. IChiefs ayidlalanga kuhle ngo2024 lapho eyakhitshwa khona kuCastle Lager Premiership ngesikhathi kuphuma iHwange leArenel.
Iqale umnyaka ikhangelelwe ukuthi izancintisana leHwange leArenel kodwa lezizombili zibhekane lobunzima obuthile.
IHwange ihlezi kundawo yesithathu ilemiklomelo engu-50, okutsho ukuthi ngeke yabalelwa phandle, kumbango wesicoco seligi.
IHwange izadibana le-Eagle Life esanda kwehlukana lomqeqetshi wayo uZimisele Moyo. Ohlaziya imidlalo kaDivision One, uPraise Dhlakama uthe kumdlalo weCheifs leNkayi kuzathunqa uthuli.
“Kuzaba ngumdlalo onzima. AbeChiefs ukuthi baphezulu kwengalane kaDivision One kubenza bangene kuyibo abakhangelelweyo ukunqoba njengoba bekhokhela ngemiklomelo emithathu. OkweNkayi okokwehlisa imiklomelo emihlanu kumidlalo emibili esanda kudlula sokuphathise iChiefs.
“Kabasoze bangene besindwa abeChiefs. INkayi ilengqobe yokumela ingqobe kukanti utshiki lobhanqa udlalela kuChiefs,” kutsho uDhlakama.
Imidlalo kaDivision One kulimpelaviki:
Nkayi United v Bulawayo Chiefs (White City) Mainline v Bulawayo City (Dingumuzi), Casmyn v Zebra Revolution (Turk Mine), Jordan Sinott (Mthwakazi), Blackrock v Bulawayo Warriors (Sinderella), Hwange v Eagle Life (Hwange), Victoria Falls City Herentals v Nust (Chinotimba), Imbizo v Bosso 90 (Lookout Masuku Barracks)
derick.khumalo