Langalakhe Mabena
UMBUKISO wakuqala we-KUZANA Sport and Creative Economy Expo Zimbabwe (SCEEZ) oqale ngoLwesithathu koBulawayo, ubalulekile ekuphakamiseni ezemidlalo kanye lezobuciko njengensika zokukhulisa umnotho welizwe.
Umbukiso wensuku ezinhlanu lo, uzaphela ngeSonto eZimbabwe International Trade Fair (ZITF) Grounds.
Uzahlanganisa uHulumende, amankampani azimeleyo, izinhlanganiso zezemidlalo, abaculi, abasekela ngemali, izifundiswa labanye abathintekayo.
Umbukiso lo uqhutshwa ngaphansi kwendikimba ethi: “KUZANA: Towards Vision 2030 through Sport and Creative Industries,” uzavulwa ngokusemthethweni nguMongameli welizwe uMnangagwa ngoLwesihlanu.
UNobhala Jikelele kugatsha olubona ngezeMidlalo, Ezokuzilibazisa, Ezobuciko lamaSiko uMnumzana Nicholas Moyo uthe amalungiselelo ombukiso ahamba kuhle njalo abahleli sebelungele ukwamukela abathengisayo, izithunywa kanye lomphakathi.
Uthe iKUZANA SCEEZ yasungulwa ukuze ibe yinkundla yesizwe yokuhlola amathuba okukhulisa, ukuthuthukisa lokwenza inzuzo ngezemidlalo kanye lezobuciko eZimbabwe.
“Umbukiso lo uyingxenye eqakathekileyo yemizamo kaHulumende yokubeka ezemidlalo lezobuciko njengengxenye ebalulekileyo ekuthuthukiseni umnotho, ukudala amathuba emisebenzi, ukukhuthaza ubuciko obutsha, ukuhuga abasekela ngezimali lokuthuthukisa abatsha beZimbabwe,” kutsho uMoyo.
Uthe uhlelo lwalumcimbi luzagoqela imihlangano yezinga eliphezulu, imbukiso kanye lemisebenzi yezobuciko lamasiko, lapho ochwepheshe labanye osaziwayo abazaxoxa ngezindaba ezithinta lezizigaba ezimbili.
Phakathi kwezihloko okuzaxoxwa ngazo kulesithi usekelo lwezemali kwezemidlalo, ukuthuthukiswa kwenkundla zemidlalo, amabhizimusi ezemidlalo, ukuthengisa, ukuphathwa kwezemidlalo, ubuciko obutsha kanye lamathuba akhona emnothweni wezemidlalo emhlabeni jikelele.
UMoyo uthe umbukiso lo uzavulwa ngeSport Industry Conference, lapho uMsekeli kaMongameli uGeneral (Rtd) Dr Constantino Chiwenga azabe engumhlonitshwa khona.
Kusasa, kuzabe sekulandelwa yiCreative Economy Conference, lapho uSekela Mongameli uColonel (Rtd) Dr Kembo Mohadi.
Umbukiso lo uzavulwa ngokusemthethweni ngoLwesihlanu nguMongameli uMnangagwa.
UMoyo uthe ukuba khona kukaMongameli kugcizelela ukuqakatheka uHulumende akunika ukuthuthukiswa kwezemidlalo lezokuzilibazisa njengengxenye yohlelo lokuthuthukisa ilizwe kusiyafika uVision 2030.
Ngaphandle kwemihlangano lembukiso, iKUZANA SCEEZ izaba lohlelo oluhlanganisa amabhizimusi, ezemidlalo, amasiko, ezokuzilibazisa kanye lokuxhumana lomphakathi.
Okunye okuzahuga abantu kakhulu yi-KUZANA SCEEZ Marathon ngoMgqibelo, okukhangelelwe ukuthi ikhuthaze abantu abanengi ukuthi bahlanganyele, baphile impilo enhle njalo kuvezwe ukuqakatheka kwezemidlalo emphakathini lasemnothweni.
I-marathon izalandelwa yiKUZANA SCEEZ Music Festival eZITF Grounds, eqala ngehola lesithupha ntambama njalo iqhubeke kuze kube sekuseni ngeSonto.
Umkhosi lo uzakuba labaculi beZimbabwe abatshiyeneyo, okugoqela umculi odumileyo uScott Maphuma.
“Umkhosi lo uzanika abantu beZimbabwe lezivakatshi ithuba lokuthakazelela ilifa lomculo ubuye unike abaculi labanye abasebenza kwezokuzilibazisa inkundla yokutshengisa imisebenzi yabo,” kutsho uMoyo.
