Londile Moyo
Zimpapers Sports Hub
INHLANGANISO ephethe ibhola kuleli, iZimbabwe Football Association (ZIFA), isiyehlise imali yokungena enkundleni kumdlalo ozahlanganisa iqembu lelizwe lamaWarriors leHighlanders ozadlalelwa enkundleni yeBarbourfields ngoLwesithathu.
Kusaziso esikhitshwe yiZIFA, abantwana besikolo abagqoke amayunifomu apheleleyo bazabhadala i-US$1 kuphela, njengendlela yokukhuthaza ukuthi abatsha labo bathole ithuba lokubukela ibhola.
Abadala bazabhadala i-US$3 esuka ku-US$5 eyayikhitshiwe ekuqaleni. Ukungena kuGrand Stand (Wings) sekubiza i-US$5, kuthi iVIP End izabiza i-US$10.
“Ngokulandela ukuzimisela kwethu ukuthi wonke umuntu abukele ibhola, abantwana besikolo bazangena nge-US$1 kuphela, kodwa kumele babe begqoke iyunifomu epheleleyo,” kutsho iZIFA.
I-ZIFA iphinde yachaza ukuthi abantwana laba bazahlaliswa eMpilo End kuphela ukuze kuqinisekiswe ukuphepha lokulawulwa kuhle.
Lumdlalo uyingxenye yemikhosi yokugubha iminyaka engu-100 yeHighlanders, elinye lamaqembu amakhulu njalo elidume kakhulu kuleli.
I-ZIFA inxusa abalandeli bebhola ukuthi bazophatheka kulumdlalo omkhulu.
“Sikhuthaza wonke umuntu ukuthi aze azobukela lumdlalo lapho amaWarriors azadlala khona egubha imbali ende yeHighlanders, okuliqembu elibe lendima enkulu ekuthuthukiseni ibhola eZimbabwe,” kutsho isaziso seZIFA.
Online Reporter