Online Reporter
Brandon Moyo
IQEMBU lelizwe labesifazane lekhilikithi amaLady Chevrons, liqede imidlalo yalo le-United Arab Emirates (UAE) ngendlela edanisayo njengoba lehlulwe ngama-runs angu-8, kuhlandla lesibili leT20I eQueens Sports Club koBulawayo.
Ama-Lady Chevrons abedinga ukunqoba ukuze alinganise impumela yemidlalo kodwa atholakale exegile, ikakhulukazi ngokutshaya ibhola, egijimise ukwedlula i-131 runs.
Ngempumela le, iqembu le-UAE liyitshaye layiphendulela iZimbabwe kulandela njalo ukumelana layo 2-2 kumidlalo yama-One Day International (ODI).
AmaLady Chevrons acelwa ukuthi aqale ngokuvimba ibhola, lama-bowlers enza kuhle ukuthi i-UAE ivinjwe iku-130/7 kuma- over angu-20.
Wona enelisa i22/8.
Akuzange kumthabise lokhu umqeqetshi weZimbabwe, uWalter Chawaguta.
“Kuyayangisa kakhulu. Besiyilungiselele kahle i-series le. Besisazi ukuthi sizabhekana leqembu elinjani. Besisazi njalo ukuthi bazangena badlale njengeqembu elingehlulwa lutho.
“Ngomnyama, asenzanga kuhle. Ngakho-ke silomsebenzi okufanele siwenze ngaphambi kwemidlalo yama-qualifiers yomncintiswano yomnyaka ozayo mayelana lekhono lokuthatha izinqumo ezifanele uma sisesigabeni kanye lezinqumo ezifanele ngebhola. Ukuvimba kusiphoxile. Leyo ngenye indawo okufanele sisebenze nzima ukuyilungisa,” kutsho uChawaguta.
Kumdlalo wakuqala, amaLady Chevrons azamile ukwenza kuhle.
UKudzai Chigora ubengowakuqala ukukhipha umdlali we-UAE, ekhipha ukaputeni u-Esha Oza esetshaye ama-runs amane kuphela.
Ngesikhathi se-over yesihlanu, uChigora uthole njalo ithuba lokukhipha uRinitha Rajith othe etshaye ibhola laganywa nguJosephine Nkomo.
Ubesetshaye ama-runs ayisikhombisa, kumabhola ayisitshiya galombili.
Iqembu le-UAE lenelise ukuphaphama lapho sekudlala uTheertha Satish loHeena Hotchandani abathole 40runs, baphanjaniswa nge-over letshumi kukhitshwa uHotchandani nguLindokuhle Mabhena.
Kaphuzanga ukukhipha omunye futhi uMabhena. Uthole uSatish esetshaye 44runs, kumabhola angu-38.
Kulandele ngokukhitshwa uSamaira Dharnidharka.
Kuthe kungena amaLady Chevrons phakathi, esetshaya ibhola, umdlalo usuke watshintsha, odade bakuleli sebedliwa.
Kuncede uModester Mupachikwa loLoryn Phiri abazame ukuthi babambelele.
UMupachikwa ubele 39 runs kumabhola angu-34. UPhiri watshaya 31 runs kumabhola angu-27. UKelis Ndhlovu ukhitshwe ele-17 runs kumabhola angu-20.
