Kwengezwa amangcwaba eLuveve

file picture

Sikhumbuzo Moyo

IKHANSILI yakoBulawayo isiveze umhlabathi ongaba yi-54 hectares lapho okuzabe kulamangcwaba afika 100 000, eLuveve.

Lokhu kuza ngesikhathi idolobho beselisilela ngendawo yokungcwaba.

Umqondisi wogatsha lweTown Planning kukhansili, uMnumzana Wisdom Siziba uthe indawo yamangcwaba entsha le, ivunyelwe ngaphansi kohlelo lweMaster Plan yedolobho.
“Uhlangothi lweTown Planning lwethule lezi indawo kulandelwa iMaster Plan. Sekutholakale umhlabathi eLuveve,” kutsho uMnu Siziba kuMasiyePhambili Weekly.

Uthe ekwethuleni umhlabathi wamangcwaba, ikhansili inanzelele, ngemva kwesikhathi eside ukuthi sekusilela indawo zokubeka asebedlule emhlabeni.

UMnu Sibanda uthe kulesidingo sokuthi kwakhiwe umgwaqo oyi-2km, oqonde phakathi kwamangcwaba amatsha.

Kusenjalo, umhlabathi lo usuhlolwe lugatsha lweHealth Services, oluyilo oluzaphatha konke okwenzakalayo, isebenzelana lezinye ingatsha ezigoqela i-Environmental Management Agency (EMA).