admin
Ethel Ncube
KUBE yisimaye maye kwenye ibhawa eseHabane, eSigodini ngempelaviki sokuyimpi yamahloka lesibhamu phakathi kwabomakorokoza lomunye usomabhizimusi uMthunywa ukuzwile lokhu.
Indabamlonyeni le okunathiswana ngayo itiye ayikacazululeki kuhle nanko phela abanye bakholwa ukuthi umakorokoza owalinyazwayo emadabukakusa amhlaka 1 Nhlangula wadutshulwa ekhanda ngombhobho, abanye labo bathi watshaywa ngembodlela kukanti abanye bathi engabe watshaywa ngesidindi sombhobho.
Lanxa kungakacaci ukuthi umakorokoza lo wadutshulwa kumbe watshaywa ngembodlela yena uthi wadutshulwa kodwa uhlamvu alusangenanga ekhanda.
Kuzwakale ukuba ngalelolanga eSharks Nite Club kwakulexukwana labomakorokoza ababezidlela imali yabo andubana baxabane labathengisa ebhawa le okwenza bona bacina befonela umninibhawa uBaron Dube.
UMthunywa uvakatshele elokitshini leHabane waxoxa lo Innocent Lima onguye owalinyazwayo ngalelolanga waveza ukuthi wadutshulwa nguDube kulandela ingxabano eyabakhona phakathi kwakhe lomunye umfana osebenza ebhawa.
“Sasizinathela emadabukakusa amhlaka 1 sasesixabana lomfana kaDube yena owahle wabiza umqhatshi wakhe wahle weza wangena ephethe isibhamu sakhe wasikhombela kumnawami andubana aze kimi.
“Okwenzakala lapho angisakuqondisisi, engikukhumbulayo nje yikuthi ngezwa umsindo wesibhamu ngaphaphama sengilele phansi igazi ligeleza ekhanda njalo kwakungaselamuntu lapho,” kutsho uLima.
Uqhubekele phambili wathi wazidonsa wayaphandle lapho abona khona abanye abangane bakhe abahle bazama ukumgijimisela esibhedlela.
“Sisendleleni yokuya esibhedlela sahlangana lamapholisa ahle angibopha ayangivalela esitokisini.
“Kwangimangalisa ukuthi ngangibotshelwani mina kuyimi engilimeleyo phezu kwalokhu ngabhadaliswa i$20 yokuvuma icala lokwenza ubudlwangudlwangu ebhawa,” kutsho uLima.
“Okungimangalisayo yikuthi umnikazi webhawa owangilimazayo kazange abotshwe.
“Engikwaziyo yikuthi wangikhombela ngombhobho wadubula kodwa ngenhlahla uhlamvu alusangenanga ekhanda lwadlula lungitshitshiliza isiphaqa,” kutsho uLima.
“Angazi ukuthi kuzahamba njani kodwa idokethi esemapholiseni ithi ngatshaywa ngembodlela mina ngadutshulwa kungakho incwadi yami engahamba layo esibhedlela ngahamba ngayayilungisisa, isibhalwe ukuthi ngadutshulwa,” etsho etshengisa intatheli incwadi yakhe.
Intatheli ixhumane lesinye isakhamuzi seHabane uNomsa Dube oveze ukuthi umsindo womhlaka 1 wawuzwa.
“Umsindo ngawuzwa sibili kodwa ukuthi ngowombhobho kumbe ngowani ngeke ngichaze kodwa bekungumsindo ongajayelekanga ongivuse ebuthongweni,” kutsho uNkosazana Dube.
Esinye njalo isakhamuzi uMnumzana Mike Moyo uthe bezwa ukukhala kombhobho ebusuku.
“Mina ngavuswa ngumsindo wombhobho ngahle ngeqa ngaqonda lapho okwakuvela khona umsindo sathola kungelabantu kodwa uInnocent elele phansi elimele,” kutsho uMnu Moyo.
Ezinye zezakhamizi zalile ukukhuluma ngale indaba zisithi azifuni kuhlukuluzwa ngoba umuntu okukhulunywa ngaye ulexuku labafana elihlukuluza abantu esigabeni.
Intatheli ibuye yakhuluma njalo lomnimnibhawa uBaron Dube yena ovumileyo ukuthi kwaba lomsindo ebhawa yakhe mhlaka 1 Nhlangula.
“Ngangisendlini ngilele ngamukela ucingo kuthiwa kulabantu abahluphayo ebhawa ngaphuthuma ngayakhona ngithwele umbhobho kodwa angizange ngidubule muntu mina.
“Mina kangitshayanga muntu umfana lo wathutsha egijima watshayeka embodleleni engangiyiphethe lami njengendlela yokuzivikela ngoba bona babelamahloka,” kutsho uDube.
Ebuzwa ukuthi ngubani lowo muntu amtshayayo uthe kamazi.
UMnu Dube uveze ukuthi omakorokoza labo babesilwa njalo babehlome ngoteketa betshaya omunye umthengi ngezidindi zehloka, abantu ababenatha lapho basebethukile bebuthene kwelinye icele.
Intatheli zixhumane lesikhulumi samapholisa uNdabezinhle Mkhwananzi ovumileyo ukuthi kwaba lokulwa ebhawa kaDube kwalimala abantu ababili oyedwa wakhona kabonakalanga kodwa lo obanjiweyo wabotshwa wabhadaliswa ifayindi emapholiseni.
Kusenjalo uMthunywa uphethe incwadi (petition) ebhalelwe umeli wedale lePhalamande weUmzingwane uWilliam Dewa zikhalaza ngobudlwangudlwangu obenziwa ngu Dube labafana bakhe esigabeni.
Online Reporter