adminYiNtatheli kaMthunywa
INHLANGANISO yeOrap-Zenzele ibambene leChevrolet iqoqe umqhugelwano wezikolo ezidlala inguqu ezilitshumi lasithupha ozadlalwa esikolo seGifford High ngoMgqibelo.
Imidlalo le isiqhutshwa okwesibili koBulawayo njalo kunxuswa lezikolo eziseMatabeleland North leSouth. Umncintiswano lo uzabukelwa ngumsekeli kaMongameli wesizwe uPhelekezela Mphoko, owaziwa kakhulu ngothando lwakhe lwezemidlalo yabantwana bezikolo.
Ngomnyaka odluleyo intshantshu zomncintiswano lo kwabayisikolo seMpopoma High.
Ekhuluma loMthunywa uBryton Malandule ongumphathi wezemali kunhlanganiso yeOrap-Zenzele, ubike ukuba izikolo zonke ezingu-16 sezilungele ukuyadla eGifford High.
“Sikholelwa ukuthi ezemidlalo ziphakanyiswa ibambana kukaHulumende lenhlanganiso ezizimele zodwa kanye labo abadlali abasakhulayo,” kutsho uMalandule.
Umphathisikolo weGifford High uJohn Nzima uthe bayajabula ukuthi isikolo sabo sesikhethwe ukuthi siphathe imidlalo le.
UNzima nguye njalo umphathi omkhulu obambe inhlelo zenguqu kunhlanganiso yeNational Association of Secondary Heads (Nash) koBulawayo.
“Kuhle ukuthi iGifford High iphathe umncintiswano walonyaka owe-Orap-Zenzele Chevrolet Under-20.
Siqakathekisa ukuthi abantwana bakhule bedlala, babelethuba lokubonakalisa ithalenta kumidlalo enjengale.”
Ngokutsho kukaMalandule, ezinye iziphathamandla ezizabukela imidlalo zibalisa uAndrew Langa uMphathintambo wezemidlalo kuHulumende lomsekeli wakhe uElizabeth Kanengoni-Malinga, uSithembiso Nyoni obona ngezamabhizimusi asacathula kanye loOmega Sibanda umsekeli kamongameli weZifa.
Online Reporter