admin
Khanyile Ndebele.
AMAPHOLISA akoBulawayo asexwayise umphakathi ukuthi ulandele isikhathi esibekwe nguHulumende sokuba semakhaya kungenwa kumnyaka omutsha.
Isikhulumi samapholisa koBulawayo, uInspector Abednico Ncube uthe abantu bandise ukuzulazula ebusuku kuqala umnyaka omutsha kodwa lonyaka kufanele belandele imithetho ebekwe nguHulumende yokuvikela ukumemetheka komkhuhlane weCovid-19 kanye lemithetho yenhlanganiso yamazwe yeWorld Heath Organisation.
UInsp Ncube ukhulume lokhu izolo eRosscamp kusuku lokuhlanyela izihlahla.
“Kasikhangelelanga ukubona izimota kumbe abantu behamba hamba edolobheni mhlaka 31 Mpalakazi 2021 ebusuku inengi labantu abathi yiCrossover.
“Imigwaqo izavalelwa umphakathi ngehola lika-2100 kusiya ku0600 ekuseni. Umuntu ozabonakala etshayela ngaphandle kwehola leli elibekiweyo lokuba sezindlini, imota yakhe izathathwa laye abotshwe,” kuchasisa uInsp Ncube.
“Sikhangelele ukuthi umuntu wonke alandele umthetho. Asijabuleleni umnyaka omutsha sisezindlini lemuli zethu ngoba akula mihlangano ezavunyelwa.
Uphinde njalo waxwayisa uzulu ukuba angagadi izimota zomhlobo wamaHonda fit ngoba aseyingozi emphakathini ikakhulu kubomama.
“Ngifuna ukuphinda ngixwayise umphakathi ngalesi sikhathi njalo ngemva kokunanzelela ukuba kumaviki adlulileyo inani lamacala okuhlukuluzwa kwabesifazana likhuphukile ikakhulu kubangelwa yikugada izimota zamaHonda fit angelama-number plates.
Uphethe ngokuthi abantu kabatshiye umkhuba wokugada izimota ezingavunyelwayo emthethweni ukuthwala abantu ngoba kunzima ukuzilandela nxa sokudalwe amacala ngazo.
Online Reporter