admin
Ethel Ncube
KULEMULI yeNkankezi eFilabusi ebabaza ingaqedi ngesimanga semikhonto okunakanelwa ukuba ivimbe ondofa akade sebehluphile emzini wayo ngokukhiphela phandle impahla ebusuku ukuthi bangene egumeni layo.
Imkhonto yomoya le kubikwa yabethelwa ngomunye uMphurofethi wakoBulawayo osezakhele udumo, uMduduzi Dube, odume ngokuthi nguBlack Elisha. Kubikwa ondofa laba bathi bengena egumeni lelolanga babona imkhonto le ekhulekelweyo bama mpo andubana bacele ezinyaweni.
UMphurofethi uDube uke waba semlonyeni yabantu ngokusebenzisa amakhiye ukukhiya abangathembekanga emtshadweni yabo.
Ubatshazwa ngokuthi usefike “wayigezisa” iNkankezi lezinye iziqinti zeFilabusi ebesezihluphile.
Ukuvinjwa kwabondofa eNkankezi kwenzakale kumaviki asanda kwedlula lapho imuli yakoJubane ehambe yayathola imkhonto kaBlack Elisha. Imkhonto le kuzwakale ukuba yabethelwa egumeni, ngenhloso yokuvimbela ondofa ukuthi bangangeni emzini lo.
Amalunga emuli le, angazange athande ukuqajwa ngamabizo, afakaze kuntatheli kaMthunywa ukuba babone isimanga.
“Bafike bama ntsi ondofa, bemiswa yimikhonto le esayibethela egumeni. Bekusifunile okungondofa lokhu kodwa kwehlulekile,” kutsho ilunga lomdeni lo elikhululeke ukukhuluma.
“Imikhonto sayithola kumphurofethi uBlack Elisha. Besimzwela khatshana ukuthi akakuthathi mango ukuvimba ububi obunje. Isebenzile ngempela imikhonto yakhe.”
Elinye njalo ilunga lemuli libike ukuba lilovalo nxa likhuluma ngodaba lolu, loba nje sekubetha umoya ekhaya.
“Thina besingalali lapha ebusuku ngemikhoba le ebilala isihlupha ithwala imiganu iyisa phandle. Ibingena endlini ibange umsindo kungalaleki ngitsho, sivuke sidiniwe.
“Ngangihlala ngisesabela impilo yami. Wake wambona undofa ejamile? Kuyethusa. Besingalali lapha ekhaya kodwa khathesi sesitshaywa ngumoya. Sesilala behle.
Uqhubeke wathi: “Kwelinye ilanga wawusizwa izisinde kodwa uvuke ukhangele uthole kungelalutho. Sacina sibona kungcono ukuthi siphakame siyedinga umuntu alungise. Samthola koBulawayo uBlack Elisha, wafika wasibethelela imikhonto emithathu egumeni,” kutsho omunye wemuli yakoJubane.
Uthe inhlupheko eyeza labo ndofa seyedlule ngoba kulezinsuku bazilalela behlalisekile.
“Lokhe kwabethelwa imikhonto sekuphileka sibili. Esakunanzelelayo yikuba lokhe kwabethelwa imikhonto, omunye esasimcabangela ukuthi wasithumela ondofa wahle wagula. Silinde ukuba nxa kunguye, asilande atsho ukuthi wayesenzani.”
Ekhuluma loMthunywa kuliviki, umphurofethi uBlack Elisha uveze ukuba imikhonto yakhe iza ngesivutha.
“Ngiyancedisa abantu ngokomoya ngisebenzisa imikhonto lamakhiye. Imikhonto le abanye sebeke babuya bayithatha iyabasebenzela. Ukusebenza kwayo kubonakale kweyinye indawo lapho emise ondofa ukungena emzini wabo.”
Ungaba layo, akulanto embi edlalela kuwe, iyisikhali esikuvikelayo,” kutsho uBlack Elisha.
Online Reporter