admin
Nkosilathi Sibanda
ISIZINI yebhola likanobhutshuzwayo kuligi ephakemeyo eyeCastle Lager Premiership iyaqala kulimpelaviki ngemva kwekhefu eledlula inyanga ezimbili.
Isizungu ebesiphethwe ngabathandi balumdlalo asisekho kukanti lamathimu asemelele ukuthi aphakulule ibhola elizathokozisa njengoba ethole isikhathi eside elolonga.
Isizini ivula ngoLwesihlanu kumdlalo odibanisa omakhelwane iHow Mine leBulawayo City. Izimbamgodi zinxusa Amakhosi enkundleni yeWhite City. Lo ngumdlalo wakuqala kuBulawayo City yona echinsa ukudlala kuligi ephakemeyo.
Ngelanga elilandelayo kuvuthiswa inkundla yeBarbourfields kumdlalo omkhulu phakathi kweChicken Inn leDynamos. Umkhulu lumdlalo ngoba udibanisa intshantshu zika2015 lethimu eyakhitshwa embusweni wePSL iDynamos.
Amalungiselelo eChicken Inn aqhube kakuhle ngokuphela kwekhefu lephasika. Intshantshu zika2016 lezi zidlale ibhola kuzwa kusukela ngoZibandlela, okuyikhona okuzifaka phezulu kweDynamos mhla zidibana.
Umqeqetshi wamaGamecocks uJoey Antipas ulokholo lokuthi ithimu yabadlali alabo izagcina inkezo yeCastle ibeyintshantshu njalo.
Ekhuluma loMthunywa ngoLwesithathu, uAntipas uthe umdlalo weDynamos awumethusi lakancane ngoba ulolonge ithimu ezaqinela ukunqoba yonke imidlalo hatshi owodwa.
“Ngiyavuma ukuthi umdlalo wethu wokuqala sileDynamos ngomdlalo omkhulu.Ithimu engiyibumbe lonyaka kumele inqobe kuyo yonke imidlalo. Iligi ilamathimu amanengi esidlala lawo, yikho ngisithi kusukela ngoMgqibelo kumele sinqobe,” nguAntipas lo.
Ezikamagebhula iHighlanders zingena umango ziqonde eColliery ukudlala leHwange. Nxa iBosso inganqoba, lo ngumdlalo ozasondeza umqeqetshi weBosso uErol Akbay duzane labalandeli bethimu. Umqeqetshi lo usebonakele ukuthi uyenelisa ukuhlanganisa umdlalo, kodwa okusakhathaza abasekeli yikuthi abadlali bayathandabuza ukuhlohla lalapho bephiwe ithuba.
Kweminye imidlalo, iTsholotsho isenkabazwe ukuyagqikilana leFC Platinum enkundleni yeMandava. Abafana beBeitbridge iBorder Strikers baqale ngokuhamba umango omude belubhekise kuZPC Kariba kumdlalo wangoMgqibelo.
UKenny Ndebele umaqhuzu weligi eyeCastle Lager wethule umbiko wokuthi abalandeli bomdlalo abakhulukele ukuyagcwala enkundleni.
UNdebele uthe inhlanganiso yakhe yenze kuhle ngokukhipha uluhlu lwemidlalo yalisizini ngokuphangisa ngoba kwenze kwabalula kubalandeli ukuthi balungiselele.
Ekhuluma lephephandaba likazulu kuliviki uNdebele uthe: “Lasuka lahlala. Yikho esingakutsho ngalesisikhathi njengoba wonke amathimu eselinde ukuvulwa kwesizini ka2016.”
Online Reporter