Uyaphambili umculi we-hip-hop

BAKAMTHWAKAZI kulezinsuku umculo we-hip hop kukhanya uthakazelelwa ngabanengi kungakho ngenhloso yokujabulisa abalandeli bethu kanye lokuthi bazi ngcono abahlabeleli ababathandayo uMthunywa uxoxisane lomunye umculi we-hip hop.

Kambe kungaba ngubani ophuma khonapha koBulawayo ngaphandle kukaStanislaus Mpofu obizwa ngokuthi nguYoung Stan. Nansi ingxoxo phakathi komculi lo, uYoung Stan (YS) lentatheli yephephandaba likazulu uCornelius Luphahla (CL).

CL: Akuchazele abalandeli ngamafitshane ngembali yakho kanye lomculo wakho?

YS: Mina ngazalwa mhlaka 23 Mabasa ngo1993 esibhedlela seMpilo khonapha koBulawayo. Ngakhulela khonapha koBulawayo elokitshini leNguboyenja. Ngaqala isikolo ngomnyaka ka1999 esikolo seLozikeyi Primary School ngaqeda ngo2005. Kwathi ngo2006 ngayangena uFomu 1 eGifford High School khonapha koBulawayo ngayaqeda ngo2010.

Ezokucula ngaziqala ngemva kokuqeda izifundo zami ngo-2010. Okwangenza ngakhetha umculo lo yikuthi ngiyawuthanda njalo ngesikhathi ngikhula yiwo owawudumile.

CL: Njengomculi akutsho ukuthi wandise ukutshayela ngaphi ingoma zakho njalo sowake wathola sicoco na lokhe waqala ukuhlabela?

YS: Mina ngandise ukutshaya emidlalweni, kuma-Hip-hop Initiatives, kuma-shows kanye lakweminye imikhosi etshiyeneyo. Lokhu ngaqala ukuhlabela ngathola umvuzo ku-Amakhosi Golden Award lapho okwakulomncintiswano wokugida kanye lokuhlabela ngo2012. Lokhu kwangichazela ukuthi ngiyathuthuka kwezomculo.

CL: Tshela uzulu jaha lakithi ukuthi abantu asebewazi umculo wakho bathini ngawo njalo lonyaka ukhangelele ukwenzelani umphakathi?

YS: Abantu asebewazi umculo wami bayawuthakazelela kakhulu njalo bangikhuthaza ukuthi ngiqhubekele phambili ngibaphakululela ukudla kwendlebe. Noma nje kukhona abangawaziyo abangela sifiso sokuwazi kodwa labo abawaziyo bayawuncoma.

Lonyaka ngikhangelele ukuphakululela uzulu idlalade elinambithekayo ukuze baqhubeke bejabule. Lelidlalade ngizalikhipha ekupheleni kwenyanga ezayo.

CL: Akutshele uzulu ukuthi ngaphandle kokucula yiwuphi omunye umsebenzi owenzayo?

YS: Mina ngaphandle kokucula ngenza ama-visual arts, graphic designs kanye lokunye nje okuphathelene lezokuzithokozisa. Ngamafitshane ngiphila ngendlela ezitshiyeneyo zokuzithokozisa.

CL: Bunzima bani oyake uhlangane labo njengomculi njalo nkuthazo bani ongayipha abaculi abasacathula?

YS: Njengomculi ngandise ukuhlangana lobunzima bokuswela imali yokukhipha amadlalade njengoba nje kudingeka imali enengi. Okunye njalo njengoba nje ngicula umculo ongadabukanga lapha abanye abantu kabawujabuleli ngakho kusuka kube nzima ukuthi ngithole abalandeli abanengi.

Kubaculi abasacathula ngithi kababambelele emculweni noma kunzima ngoba vele ekuhlabeleni kulobunzima.

Okunye njalo ngithi kabalalele inkuthazo evela kubalandeli babo ukuze baphumelele kodwa okubaluleke kakhulu yikuthi bahloniphe umphakathi. Ukuze babe labalandeli abanengi.