admin
Thokozile Mbedzi
ZILOKHU zitshwaqe umzimba izakhamizi zepulazini leSwallow Folk eGwanda ngemva kokuba enye indoda ife ngemva kokubhaxabulwa ibotshiwe kulandela ukutholakala itshontsha.
Kubikwa uBrighton Kilibhoyi oleminyaka engu-24 utholakale etshontsha imali engange R1 500, umakhalekhukwini le-torch endlini kaStanton Ncube ngoLwesibili ngeviki ephelileyo aze atshaywe.
Ekhuluma lentatheli kaMthunywa uMnumzana uMnumzana Shepherd Moyo uveze ukuthi uBrighton utholakale etshontsha wasezama ukulwisa umninindlu kodwa wehlulwa.
“Kube yisiphansi phezulu uBrighton esekhandwe etshontsha kulokuthi axolise yena uphambanise ngokuzama ukutshaya umnikazi wempahla okuyikho okubangele ukuthi uStanton atshaye ukhwelo abangani bakhe ababili bagijima bezomsiza.
“Abathathu laba bafika babamba uBrighton bamtshaya ngemva kwalokho bambophela esihlahleni andubana bathumele ilizwi kunina.
Kubikwa ngelanga elilandelayo unina kaBrighton wafika ekuseni basebeqonda enkambeni yamapholisa kodwa wabhubha bengakafiki.
“Kukhanya bathi besendleleni uBrighton wawa wahle wafa. Abantu abanengi bebehlala bekhala ngokutshontshelwa impahla etshiyeneyo kodwa akula obecabangela uBrighton,” kulandisa uMnu Moyo .
Isikhulumi samapholisa esabelweni seMatabeleland South ulnspector
Philisani Ndebele ebuzwa ngodaba lolu uthe solufikile ehofisini yakhe njalo uxwayisa uzulu ukuba engafaki umthetho ezandleni zakhe.
Online Reporter