Online Reporter
YiNtatheli kaMthunywa
UKUTHENGA kumbe ukuthengisa utshwala ngesikwelede kulicala ngaphansi komthetho weZimbabwe njalo labo abakubhizimusi leli abafana labalamabhawa bangabhadaliswa ifayindi nxa bangabuthengisa ngesikwelede.
Umthetho weLiquor Licencing Act [Chapter 14:12] Section 81 uveza sobala ukuthi utshwala bungathengiswa imali yakhona kumele ibhadalwe khonapho.
Okutsho ukuthi kulicala ukuthi umuntu anathe utshwala abesebubhadalela ngesikhathi esizayo.
Umthetho lo, yingxenye yezindlela ezehlukeneyo zokubona ukuthi umsebenzi wabamabhizimusi okuthengisa utshwala liyahamba njalo ukuvikela ukuthengiswa kotshwala ngesikwelede ngoba isikwelede leso kungenzeka sikhule kubangele ukungahlangani kwezinto.
Ngaphansi komthetho lo, umnikazi webhawa kumbe umaneja wendawo ethengisa utshwala ulemvumo yokuxotsha umuntu owenza okungakhangelelwanga nxa esedakiwe kunye lobangela ubudlwangudlwangu.
Phezulu kwalokho, labo abalomkhuba wokufuna ukuthengelwa utshwala izikhathi zonke kodwa bona bangaze bathengela abanye, abaziwa ngokuthi ngama-poacher bangaxotshwa emabhawa lezinye indawo ezithengisa utshwala.
Umthetho lo uhlezi ukhona, loba amapholisa eZimbabwe Republic Police (ZRP) bengakhangeli ukuthi uyalandelwa yini.
Lokhu kubangela ukuthi abantu abanengi banathe utshwala ngezikwelede njalo abanye bakhona bacine besehluleka ukubhadala izikwelede zakhona emabhawa.
Ekhuluma kuhlelo lokuthuthukiswa kweLiquor Licencing Act, olwenzelwe eMutare kuviki ephelileyo, uOfficer-in-Charge (Crime) enkambeni yamapholisa yePolice General Headquarters, uChief Inspector Tonderai Brian Chigweshe, uthe abakubhizimusi lokuthengisa utshwala kunye lababuthengayo kabalalwazi ngomthetho lo, leminye okumele bayilandele.
“Okukhona yikuthi bonke abathengisa utshwala benza lokhu ngaphansi komthetho weLiquor Licencing Act, kodwa abakwazi okumunyethwe ngumthetho lo. Abakwaziyo nje yikuthola inzuzo.
“Inengi lenu kalikwazi ukuthi ukuthengisa utshwala ngesikwelede licala. Kanye lokuqhubeka uthengisa utshwala isikhathi sesedlule lakho kulicala. Ukungazi ngeke kukuncede ukuthi ungabotshwa,” utshonjalo.
