Online Reporter
Nkosilathi Sibanda
KUQALE izifundo zokuqeqetsha ze-CAF D eGwanda, esabelweni seMatabeleland South, ngaphansi kohlelo lweZimbabwe Football Association ngoMvulo.
Kuhlangene abaqeqetshi abavela ezigabeni ezehlukeneyo zeMatabeleland South lakwezinye indawo eziseduzane.
Izifundo lezi ezizaqhubeka kuze kube mhlaka 1 Ntulikazi, ziyingxenye yemizamo yeZifa yokuqinisa ukuthuthukiswa komdlalo wenguqu kusukela emazingeni aphansi ngokunika abaqeqetshi ulwazi oluqondileyo lokukhulisa ithalenta labadlali abasakhulayo.
Abahlanganyela kulezi izifundo bafundiswa ngendlela zakulezinsuku zokuqeqetsha abadlali, ukuhlela izifundo zokuzilolonga lokuthuthukisa amathalenta.
IZifa ithe ukuqeqetshwa lokhu kuqakathekile ekukhuliseni umdlalo ngoba abaqeqetshi balomlandu wokunanzelela lokulolonga ithalenta emphakathini, ezikolo lasemaqenjini abakuwo.
“Izifundo zeCAF D License zithathwa njengesisekelo kulabo abafuna ukungena emsebenzini wokufundisa inguqu, njalo zigxile kakhulu ekuthuthukiseni abadlali abasakhulayo lokwakha uthando emdlalweni,” kutsho umbiko weZifa ngoLwesibili.
IZifa ithe inhlelo ezifana lalezi ziyingxenye yomkhankaso wokuvuselela umdlalo wenguqu elizweni lonke ngokwengeza inani labaqeqetshi abafundisiweyo.
