Online Reporter
YiNtatheli kaMthunywa
UMLOBI wengwalo zesiNtu, ophinda abengumcubunguli wezemidlalo yokuzithokozisa, uChristopher Mawande Ncube usebabaze ngomsebenzi weqembu leBezu Rocking Stars, ebika ukuba lilekusasa elihle kwezomculo.
Iqembu leli, eliqhunsa umculo we-disco, lithandwa linengi kuleli laseSouth Africa lapho elisebenzela khona. IBezu Rocking Stars elikhokhelwa nguVeenance Nhari, lilamantombazana amathathu okugoqela yena uNhari, uMagg Nkomo kunye lo-Isabel Ndlovu.
UNcube uthe kukhulu okuzayo kuleliqembu.
“Njengoba inhlathu isidla ngamabala ayo, iqembu lomculo we-disco leli lilandelwa ngabanengi lapha eJohannesburg njalo lasekhaya bayalilandela. Ngibona lilekusasa enhle. Ngethalenta abalalo, langokuzimisela kwabo esitejini, indlela zimhlophe kwezomculo.
“Yeka abadala bethi umuntu wonke uzalwa efumbethe isipho asiphiwe ngumdali labaphansi. Yikho esikubona kuBezu Rocking Stars,” kutsho uNcube, ekhuluma lentatheli eseGoli.
IBezu Rocking Stars yasungulwa ngomnyaka ka2023, inhloso kungeyokugida. Kuthe ngomnyaka ka2024 amalunga alo asungula umculo wawo owe-disco.
“Odade beqembu laba nxa besenza into yabo, amehlo adla asuthiseke, uzwe abantu besithi kungathi abalawo amahlombe. Nxa ukhangela uVeenance odume ngegama lakhe lokudlala elithi Bosslady, ungavuma sibili ukuthi owathi indlovu ayisindwa ngumboko wayo wayetsho ngoba ekubonile lokho. Yintombi ewondlekileyo ongeke wavuma ukuthi ingagida abantu bavume ngamakhanda njengontulo,” nguNcube lo.
Ekhuluma lentatheli, uNhari uthe baledlalade elilodwa elilengoma ezitshisa kakhulu. Ubike ukuthi abalandeli babo bathanda kakhulu ingoma ethi, Ngibambe Ngesandla Sakho Dali.
“Umsebenzi wethu siwenza ngenkulu inhlonipho ngoba abalandeli bethu bafana labaqhatshi bethu. Abantu bayawuthanda umsebenzi wethu, sithembisa singelavalo ukuthi kunengi esisazobenzela khona, “ kutsho umkhokheli weqembu lo.
Uthe balokusebenzisana lamanye amaqembu ikakhulu nxa becelwe ukuthi bayegida kwezinye indawo.
“Siyacelwa ukuthi siyegida emidlalweni efana lemitshado loba lapho abantu bethakazelela insuku zokuzalwa kwabo.
“Singajabula nxa singathola abantu abangasixhasa ngemali langezinye izinto ezingaba lusizo kundima yethu yomculo. Kuyinto eyaziwayo ukuthi abantu abananzeleli abaculi abatsha, bakhetha ukukhipha imali bexhasa abaculi
abakhulu.
“Kunzima kodwa sizakuwa sivuka iphupho lethu lize lifezeke. Into engijabulisa kakhulu yikuthi lapho esibizwa khona sitshiya abantu besuthisekile ngomsebenzi wethu,” nguNhari lo.
