Online Reporter
Zimpapers Sports Hub
UKAPUTENI we-Zimbabwe T20I uSikandar Raza kubikwa ukuba usefake isikhalazo ku-Harare Metropolitan Cricket Association, esola umqeqetshi weRainbow Cricket Club uBlessing Mafuwa ngokumhlukumeza ngombala wakhe.
Isehlakalo lesi senzakale kumdlalo weVigne Cup phakathi kwe-Old Hararians leRainbow mhlaka 1 Nhlangula, lapho uRaza abika ukuba uMafuwa wamthuka ngamazwi, ekhuluma kubi ngombala langomdabuko wakhe.
“Ngithe ngiphuma enkundleni ngenxa yokwehluleka kokuqina kwemisipha emzimbeni, uMafuwa wavele wahayiza wangithethisa, phezu kokuthi bengimncenga ukuthi akhulume ngenhlonipho, waqhubeka ngokungihlukumeza, okwaba buhlungu kakhulu lapho ethi, ‘Ngingatsho loba yini engiyifunayo, ngilephasipoti yeZimbabwe, hatshi eyePakistan njengoRaza. Yilizwe lami leli, hatshi iPakistan.
“Ngemva kweminyaka engu-23 ngikuleli, leminyaka engu-14 ngiyisizalwane ngiphathwa zinkulumo phambili kwabanye abadlali abalombala owehlukeneyo. Ngicela ukuthi uMafuwa athathelwe amanyathelo aqinileyo ngokuhlukumeza umdlali welizwe lokaputeni ngenhlamba,” kutsho uRaza esikhalazweni sakhe.
Kodwa, uMafuwa uzigezile kulokhu, wabika ukuthi kazange amthethise ngenye inhlamba. Uthe yena wasola ukuthi uRaza wayengenele ukuyatshaya ibhola kodwa engafuni ukuthi ayevimba.
“Sadlala le-Old Hararians. URaza wafika enkundleni watshaya amabhola, waphuma njalo wabhoda inkundla eloBrandon Taylor. Ngelikade, bebika ukuba uRaza uselimele. Wabuza ukuthi usehlaleleni phansi, wangichasisela ngokulimala kwakhe, esithi ulinde udokotela. Kodwa, kazange abonakale udokotela.
“Wathatha okwakhe waphuma enkundleni, ngambuza ukuthi kambe yiyo indlela ikhilikithi edlalwa ngayo, engumdlali ohlonitshwa kakhulu kuleli njengokaputeni welizwe, Saphendulana kodwa kangizange ngimthethise,” kutsho uMafuwa.
Uqhubeke wathi: “Ulamanga. Okubi engamtshela khona kulapho esetshayela imota yakhe esuka esasime khona.
Ngamtshela ukuthi f-off. Yikho engamtshela khona. Ngamtshela ukuthi ulandelwa ngabafana abasakhulayo ngakho kumele axolise, achaze kubadlali abasakhulayo ukuthi kungani engangenanga wavimba enkundleni,” kutsho uMafuwa ekhuluma kungxoxo esigcwele kunkundla zokuxhumana ku-Social Media.
Udaba lolu lusaphenywa okwakhathesi. Kumdlalo lo uRaza watshaya 78 runs, ngesikhathi i-Old Hararians inqoba nge-142 runs ngohlobo lwe-DLS Method.
