Online Reporter
Ethel Ncube
INHLANGANISO ebona ngezokulima eye-Agricultural and Rural Development Services (Ardas) isixwayise abalimi ukuthi kulesi isigaba sokulima bangathandabuzi ukulima isilimo sama-cucumber ngoba alenzuzo kumlimi.
UMnumzana Bhekilizwe Ncube onguDeputy Director kunhlanganiso ye-Agricultural and Rural Development Services (Ardas) esabelweni seMatabeleland North ukhuthaze abalimi ukuthi belime ama-cucumber ngoba alenzuzo enhle.
Uthe ukulima ama-cucumber akuhluphi njalo alinywa umnyaka wonke.
“Ukulima ama-cucumber akuhluphi futhi alinywa umnyaka wonke. Kuphela kawafuni kulinywa endaweni ezilomqando kumbe ezilomumo womkhathi ongaphansi kwe-20 degrees Celsius.
“Sikhuthaza abalimi ukuthi beqale ngokulungisa umhlabathi bebulale amagade babe sebefaka umquba kumbe uCompound C,” kutsho uMnu Ncube.
Uthe ekuhlanyeleni abalimi bakhuthazwa ukuthi bahlanyele besenza imizila.
“Sikhuthaza abalimi ukuthi nxa behlanyela benze imizila engaba yi-60 kusiya ku-75cm njalo bevule izikhala phakathi kwaleyo mizila ezingaba yi-120 kusiya ku-150cm ukwenzela ukuthi ama-cucumber akhule kuhle,” kutsho uMnu Ncube.
Uthe nxa abalimi sebehlanyela begebhe amagodi angaba yi-30cm ukutshona.
“Ngemva kokumilisa inhlanyelo abalimi bakhangelelwe ukuthi bayigxumeke kutsha sekwedlule inyanga.”
