adminEthel Ncube
INHLANGANISO yabalimi yeZimbabwe Farmers Union isikhuthaze abalimi kuleli ukuthi balime i-soya beans ngoba zilenzuzo engcono njalo zisetshenziswa ukulungiswa ukudla kwezifuyo kanye lokwenza amafutha okupheka okwenza ukuthengiswa kwazo kube lula.
UMkhokheli walinhlanganiso uMnumzana Abdul Nyathi ukhuthaze abalimi ukuthi balime lesi isilimo ukuze bazitholele imali njalo benelise lokulungisela izifuyo zabo ukudla.
“Isilimo lesi asidingi umsebenzi omkhulu, okwaso kuphela yikuthi sithole amanzi. Ngiyazi abalimi basibona njengento engelancedo kodwa silusizo ngoba amankampani enza amafutha ayasisebenzisa,” kutsho uMnu Nyathi
Uqhubekele phambili eveza ukuthi abalimi bangahlanyeli inhlanyelo abayigcinileyo ukuze bathole inzuzo ephezulu.
“Abalimi kabahambe kumankampani afana labo-Seedco betsho ukuthi indawo yabo ilezulu elinganani ukuze babathengisele inhlanyelo elungele indawo yabo ngoba iyimihlobo etshiyeneyo.
“Inhlanyelo le evela ekuvuneni ayilasivuno esihle njalo iyahlaselwa yimikhuhlane,” kutsho uMnu Nyathi.
Ekhuluma lentatheli uMnu Nyathi uveze njalo ukuthengisa i-soya beans akuhluphi ngitsho ngoba balutshwana abalimi abasilimayo.
“I-soya beans ziyasilela kumankampani amanengi, umlimi ulakho ukuthengisela iGrain Marketing Board, iAgrifoods leUnited Refineries. Ithani eyodwa yesilimo lesi yi$400, le yinzuzo enhle kakhulu.
Ubuye njalo wakhuthaza abalimi ukuthi bangathandabuzi ukuya emaHofisini eAgritex aseduzane labo ukuze bafundiswe ngokulima izilimo lesi.
Online Reporter