Online Reporter
Bhekimpilo Tshalibe
ABALIMI besifazane sebekhuthazwe ukuthi baqine ngomsebenzi wokulima ukuze bathole ukuziphilisa lokunakelela imuli zabo.
Inkuthazo le ivele kummeli wesabelo seMatabeleland North edale lePhalamende u-Elizabeth Masuku ngesikhathi ekhuluma kumbuthano wokubona isivuno somlimi uNkosikazi Noziphele Mpandla, esiqintini seMbethe, eMbembesi, eMatabeleland North ngoLwesihlanu ngeviki edluleyo.
UMasuku uthe ngokuqakatheka kwendima edlalwa ngabantu besifazane ekuletheni ukudla emulini, kumele bakhuthazwe okuzwayo kwezokulima.
UNkkz Mpandla wathola isivuno esihle somumbu ngokulima ngogatshompo, indlela yokulima esithakazelelwa ngabalimi abanengi abathola isivuno esihle eminyakeni edluleyo.
Abalimi bacetshiswe ukuthi balandele okwenziwe nguNkkz Mpandla.
“Siyabonga umsebenzi omuhle owenziwa ngabalimisi owokufundisa abalimi ngohlelo lokulima olweNtwasa.
Ngithanda ukukhuthaza abalimi, ikakhulu omama ukuthi belime umumbu njalo besebenzise ugatshompo ukuze bethole isivuno esiphezulu ukuze lathi njengelizwe singabi sithenga umumbu kwamanye amazwe,” kutsho uMpandla.
UNkkz Mpandla uthe uthole isivuno esiphezulu ngenxa yokulima ngogatshompo.
“Ugatshompo uyanceda kakhulu ngoba thina salima indawo enkulu njalo saqalisa ukulima ilanga litshisa, izulu lingasani okwesikhathi eside, kodwa senelisile ukuthola isivuno esiphezulu,” kutsho uNkkz Mpandla.
Omunye wabalimi uNkosazana Thenjiwe Nyalika owathola isivuno esiphezulu uthe useyazi iGrain Marketing Board (GMB) ngogatshompo.
“Mina eminyakeni edluleyo ngalima ngogatshompo ngathola isivuno esiphezulu njalo ngenelisa ukuyathengisela abe-GMB umumbu. Okunye njalo sengathenga inkomo ngemali engayithola ngokulima ngogatshompo,” kuphetha uNkkz Nyalika.
