Online Reporter
Innocent Kurira
KULENGOMA yabalandeli beHighlanders lapho abafunga begomele ukuthi ngeke kwenze ukuthi iqembu labo linqotshwe egumeni layo, eBarbourfields.
Isihloko sengoma le ngesithi “Khona sizake sibone”. Babike ukuba bazakhweza amaphimbo beyihlabela mzwana iHighlanders idlala leScottland ngeSonto.
Abalandeli abakhulume leZimpapers Sports Hub, bathe ngeke banqotshwe liqembu elisanda kuchinsa inkundla zePremier Soccer League.
Bathe ngeke bayizwe eyomnikazi weScottland uPedzisayi Sakupwanya, eyokuthi izanqotshwa nge 4-0.
UGeorge Sibanda, osesekele okwesikhathi eside uthe uSakupwanya utshaye iganga ngesifiso sakhe asethule emphakathini.
“Okutshiwo nguScott ngeke kwenzakale eBarbourfields. Ngibona ukuthi iqembu lakhe lizehlulwa 3-0. Ukuzivikela kwabo kuyantengantenga, sizakusebenzisa lokho, kutsho uSibanda ekhuluma ngesibindi somlandeli weBosso.
Omunye umlandeli weqembu leHighlanders uGift Zulu, laye ulethemba elifanayo ngendlela iqembu lakhe elidlale ngayo.
“Sileqembu elilabadlali abancane eselithola ukuhlangana, ngakho-ke ungaqiniseka ukuthi ayikho indlela esingehlulwa ngayo nge 4-0,” kutsho uZulu.
UChankee WeBosso, owaziwa ngokuhlakanipha kwakhe endabeni ezithinta iBosso, uthe: “Bavunyelwe ukuphupha.”
Loba kunjalo umlandeli weqembu leDynamos uJohn Tigere wethuse abalandeli bamaqembu womabili ngembono yakhe engajayelekanga emdlalweni lo.
“Kungumdlalo ohlabusayo. Ngizathanda ukubona iHighlanders inqoba. Ngesizatho esithile, ngiyabalwela ukuthi banqobe,” kutsho uTigere.
