IKhami Prison ithola uncedo lokwenza ividiyo

I-Khami Prison Choir

Nkosilathi Sibanda

UKUBA sejele akubalahlisanga ithemba lekusasa elingcono abeqembu labaculi beKhami Prison Choir.

Iqembu leli lithola isikhathi sokuqoqa, ukubhala kunye lokulolonga ingoma ngesikhathi ezinye izibotshwa zingenzi lutho.

Ngenxa yomzamo wabo wokuziguqula ngokuhlabela, iKhami Prison Choir, isikhethwe ukuthi icule emicimbini eyahlukeneyo ejele lasemitshadweni.

NgoMgqibelo odluleyo bebesemcimbini wokwethulwa kwesibholane eKhami Prison, kuhlelo lwePresidential Borehole Drilling lapho uMphathintambo wogatsha lwezeMali lokuThuthukiswa koMnotho, uMthuli Ncube, ethule khona isibholane.

Iqembu leKhami Prison Choir licule kwajabula uNcube, ohle wabanikeza isipho sokuthi bayekwenza ividiyo yengoma yabo lapho abafuna khona.

Lokhu bazakwenza bencediswa yiKulture Studios engaphansi kweMthuli Ncube Foundation

“Lihlabela kuhle kakhulu. Ngifuna ukuthi lihambe liyekwenza ividiyo yengoma yenu. Lizahamba lapho elifuna ukuyakhona, loba kuseMatobo kumbe ngaphi,” nguNcube lo, etshela amalunga eKhami Prison Choir.
IKhami Prison Choir ilamalunga alitshumi.