Online Reporter
Bhekimpilo Tshalibe
ABALIMISI sebexwayise abalimi ngokulima izilimo ezazingavamanga ukulinywa ngabalimi abanengi, ngoba zilenzuzo nxa umlimi angathola lapho angazithengisa khona.
UMnumzana Mduduzi Dube ongu-Agronomist kunkampani ye-Agriseeds uthe abalimi abanengi besabela khatshana ukulima isilimo esinjenge-broccoli, khepha yisilimo esingalinywa yiloba ngubani azenzele imali yakhe enhle.
Uthe i-broccoli kayitshayisi umlimi ngitsho ukuyilima ngoba kayihluphi.
“I-broccoli kayihluphi ukulima futhi ilakho ukulinywa kusukela umnyaka uqalisa uze uyephela loba abanye bethanda ukuyilima ngesikhathi somqando,” kutsho uMnu Dube.
Uthe isilimo lesi kasifuni kuminyaniswa nxa silinywa ukuze umoya ungene kuhle njalo sikhule kuhle.
“Abalimi nxa behlanyela i-broccoli kumele benze imizila. Imizila le kumele yehlukane nge-60 kusiya ku-70cm.
“Kuhekitha yinye ngayinye kumele kuhlanyelwe izilimo ezingu-44000 ukuze zikhule kuhle,” kutsho uMnu Dube.
UMnu Dube ubuye wakhuthaza abalimi ukuthi behambise umhlabathi wabo uyehlolwa ukuze befake isilinganiso somquba esiqondileyo.
“Sikhuthaza abalimi ukuthi bengakafaki umquba ezilinyweni zabo beqale bacuphe umhlabathi wabo uyehlolwa ukuthi kawuzake ufakwe umquba.
“Okunye njalo nxa umlimi engakaze afake umquba wenkomo ensimini yakhe simkhuthaza ukuthi efake umquba we-A.N ongaba yi-400kg kusilimo sakhe, ukuze sibe sihle futhi simuphe inzuzo,” kuphetha uMnu Dube.
