Online Reporter
YiNtatheli kaMthunywa
I-ZIMBABWE Parks and Wildlife Management Authority (ZimParks) isibike ukuthi kusukela ekuqaleni kwawonalo umnyaka, sokulabantu abangu-18 asebebulewe zinyamazana zendle kukanti abangu-32 balimala elizweni lonke jikelele.
Kusistatimende esikhutshwe yisikhulumi seZimParks, uMnumzana Tinashe Farawo uthe bamukela imbiko efika 579 yengxabano yabantu lenyamazana zendle.
Umphakathi ohlala duze lalapho okuhlala khona inyamazana yiwo obelomonakalo omkhulu kakhulu.
“Izigaba ezisendaweni ezehlukeneyo zelizwe sezilahlekelwe zinkomo ezingu-53 lembuzi ezingu-85. Inani leli likhuphuke lisuka ku-18 le 21 ngomnyaka ka2024.
“Sokulenyamazana zendle ezingu-129 ezathuthwa zayalapho okuvikeleke khona ikanti ezingu-158 zasuswa,” kutsho uMnu Farawo.
Uqhubekele phambili eveza ukuba bazaphatheka kumikhankaso yokulimukisa izigaba eziseduzane lalapho okulenyamazana zendle, ngengozi abangabhekana lazo kunye lendlela zokuzivikela.
“Sizabe sikhulumisana lomphakathi kulabo abancelelane lalapho okuhlala khona inyamazana ukuze bazi ingozi ezingabehlela lokuthi behlale belamaqhinga okuthi bangenza njani bengahlaselwa,” kubika uFarawo.
Izabelo ezihlaselwa kakhulu zingozi zenyamazana yilezi: Binga, Hwange, Kariba, Chiredzi, Hurungwe, Nyaminyami leMbire kunye lezindawo eziseduze lalapho okuhlala khona inyamazana.
“I-ZimParks izimisele ukuba ibone ukuba abantu baphilisana kuhle lenyamazana zasendle njalo izabe ikhankasa ikhuthaza ngendlela ezingenza abantu bavikeleke kundlela inyamazana eziziphatha ngayo,” kubika uFarawo.
Ubuye wakhuthaza uzulu ukuba ingozi zonke ezidalwa zinyamazana ebantwini zibikwe.
“Sikhuthaza uzulu ukuba angekeli ukubika ingozi zezinyamazana eZimParks Problem Animal Control, lakunkokheli zomdabu, kubokhansila kanye lasekhansilini ukuze sigcine impilo,” kuphetha uFarawo.
