Online Reporter
Ethel Ncube
AMAPHOLISA akoBulawayo asexwayise izakhamizi ukuthi zitshiye umkhuba wokwethusa umphakathi ngokuthumela imbiko engayisiyo kunkundla zokuxhumana.
Isikhulumi samapholisa koBulawayo, uInspctor Nomalanga Msebele ubike ngokukhathazeka ngemlayezo egcwele kunkundla yeWhatsApp esabalaliswa nguzulu osekubangela ukuthi izakhamizi zakoBulawayo zihlalele evalweni.
“Kulombiko obhoda enkundleni zokuxhumana i-audio yowesifazana okhuluma ngokuthi kulomfundi weyunivesithi yeNUST obanjwe ngabantu bamabhemba osesibhedlela seMpilo okulomfanekiso womfana oqunywe isandla lumbiko ungamanga, akulacala elinjalo elavulwayo.
“Umfana olaliswe esibhedlela seMpilo wavela eNkayi njalo eMpilo walanda ukuzokwelatshwa.
Akulamfundi weNUST owabanjwa ngabafana bamabhemba.
“Kumacala abahlasela ngamabhemba koBulawayo sesibophe abaphatheka ekudaleni amacala la, okuhlasela abantu ngamabhemba.
“Ebantwini abalinyazwa ngabantu ngamabhemba salahlekelwa ngabantu ababili. Sicela uzulu nxa ethumela imbiko ku-whatsApp babe leqiniso lalokho abakutshoyo.
“Zakhamizi zakoBulawayo ungezwa ulutho qonda emapholiseni aseduze lawe uyezwisisa ngodaba lwakhona,” kutsho uInsp Msebele.
