Online Reporter
YiNtatheli kaMthunywa
KULENINA leMberengwa eligwetshelwe ukuyapika iminyaka eyisikhombisa ngecala lokubulala umntanalo olenyanga eziyikhombisa ngokumfakela itshefu.
Inina leli, uFelistas Mpofu oleminyaka engu-21 kubikwa wabulala umntanakhe oyinkazana kuminyaka emibili edluleyo.
UMpofu kubikwa wavakatshela eMandava, eZvishavane losane lwakhe olwaluleminyaka eyisikhombisa evela kibo eMberengwa. Kuvele ukuthi wathatha umuthi wokubulala amagundwane wawuvuvuzela echagweni losane andubana alunathise ngembodlela.
Kubikwa njengomuntu owayengelandawo yokulala, wacela komunye waphiwa indawo yokucatshisa ikhanda kodwa ngalobo busuku usane lwalala lukhala kwaze kwasa okwenza lo owayemnike indawo yokulala wathi bahambise usane esibhedlela seZvishavane General Hospital lapho olwafika lwedlula khona.
Kubikwa ngesikhathi inina leli selithatha impahla zalo, inina elalimnike indawo yokulala lananzelela ukuthi impahla zikaMpofu zazilephunga, wasebona igula elalilochago kodwa elalinuka umuthi alihambisa emapholiseni.
Isidumbu sathwalelwa eUnited Bulawayo Hospitals (UBH) lapho okwavela ukuthi usane lwabulawa yikudla itshefu.
Ebuzwa emthethwandaba ukuba wakwenzelani lokhu, umsolwa uveze ukuthi kungenxa yokuba ubengenelisi ukondla usane lolu.
Umantshi ekwethuleni isigwebo unanzelele ukuthi umsolwa usemutsha futhi ubeqala ukudala icala kungakho inikwe isigwebo seminyaka eyisikhombisa.
INational Prosecuting Authority ekhasini layo lokuxhumana ibike ukuba indaba le izwisa usizi.
“Le yindaba ezwisa usizi egcizelela indingeko yosekelo kwezempilakahle yengqondo, imfundiso yokuba ngumzali, lokuvikelwa kwezingane kuwo wonke amazinga,” kutsho i-NPA.
