Online Reporter
Ukukhulisa umntwana akusinto elula ngoba kudinga uthando, imali kunye lesikhathi sakho ngoba konke kuyadingeka ukuze umntwana akhule ngendlela eqondileyo futhi elwazi uthando lwabazali.
Kuyadanisa-ke ukuthi bakhona abesilisa abasuka bondliswe abantwana abangasi babo ngelikade kube sekuvela ubaba wangempela womntwana.
Lokhu kuhlukumeza umntwana kunye lowesilisa onguye ozithola esondliswa abantwana abangasi bakhe. Kwezinye izikhathi uzwe kutshiwo ukuthi umuntu owazi uyise womntwana ngunina.
Zinengi izehlakalo ezifana lalezi esihlezi sizizwa, ezinye sibala ngazo lakumaphephandaba lakunkundla zokuxhumana.
Abanye bondla abantwana kusukela bezalwa baze bathi sebesiyakwenda kube yilapho okuvela khona uyise womntwana wangempela. Abanye njalo kuvela nxa umntwana esegula kulabo abahamba kwabezomoya sebesitsho ukuba umntwana kumele asiwe kwabakibo.
Kukanti abanye bayabe bekubona kodwa kubenzima ukuthi bakutsho ukuthi umntwana lowo kafani labanye abantwana basekhaya.
Kuyadanisa ukuthi abantu abathetheneyo abasathembekanga emitshadweni yabo bayaphuma phandle, bayehlangana labanye abantu bona betshadile okuyikho okucina kubangela ukuba abantwana bacine besiyazalelwa ezibayeni zabanye.
Kungumbono kaMthunywa ukuthi ukondlisa umuntu umntwana ongasi wakho kubangela izingozi kunye lodlame phakathi kwabathetheneyo.
Kukanengi sifunda izindaba zamadoda abulala abafazi ngoba esethole ukuba ondliswa abantwana abangasi babo.
Kuliqiniso ukuthi abanye abesifazana benza isinqumo sokungatsheli omkabo iqiniso ngoba bephindisela okubi abayabe bekwenziwe ngomkabo kodwa kuyadingeka ukuthi ekuphindiseleni kube lokuzivikela ukuze kungacini kusiba labantwana abangasi bekhaya ngoba kwezinye izikhathi umuntu uyabe ephethe esondla ongasi wakhe owakhe emphika futhi edubeka.
Kungcono kuthiwe umuntu akondli ngoba engafuni kumbe elezinye izizatho, hatshi ngoba ethi ingane kayisi yakhe ekubeni ingeyakhe.
Kuyadingeka ukuthi abesifazane bangadukisi abantwababo futhi bangondlisi amadoda abantwana abangasi babo. Kukanti lani madoda lingaze laphika abantwabenu ngoba libalekela ukubondla. Kungcono ukuvuma wehlulwe nje zimali zokondla kodwa usenza imizamo yokugcina ingane engeyakho.
