admin
Johas Moyo
NGENXA yothando lwenotho kulojaha wePhumula South koBulawayo oqilibezelwe imali engange $650 ngomunye uMadzibaba ethi umthengisela undofa, uMthunywa uyakuveza lokhu lamhlanje.
U-Paddington Gade ohlala ePhumula South uphucwe i$650 nguMadzibaba Knowledge Nyoni wasechaza ukuthi imali le wayidlelwa ethi uthenga undofa.
Kubikwa uNyoni uqilibezele uGade imali le esebenzelana ndawonye lomgane wakhe uTakesure Hungwe Mangadzi ohlala ku-B5510 eOld Phumula.
Kuzwakale ukuba uGade walanda uHungwe efuna undofa kodwa wathi kalaye okwenza bayamdinga kuNyoni owacina etshayela imali yakhe esikhewini wasedliwa ngumswenya.
UMthunywa uxhumane loGade onguye owayefuna ukuthenga undofa wathi imali yakhe yahamba ikhala nje.
“Ngangidinga uncedo kanti ngiqilwa ngikhangele kodwa ngingaboni,” kutsho uMnu Gade.
Ebuzwa ukuthi undofa lo wayefuna ukumenzani uMnu Gade uthe ayefuna ukukwenza ngaye akulani loMthunywa.
Ubikele uMthunywa ukuthi wahamba kuHungwe esiyathenga undofa kodwa wathi kalaye kumele amthenge kuNyoni.
“Ngahamba ngisiyadinga usizo lukandofa kuHungwe kodwa wathi kakwenelisi lokhu wasebiza umngane wakhe onguye owadla imali yami. Wafika kimi elamangqongqo lophondo olulensiba wathatha iphephandaba elidala walitshisa laguquka laba yimali wangithuma ukuyathenga ngayo emavinkilini ngayaphenduka letshintshi wasesuka lapho wathi kangimuphe imali engange$220 ukuthi angilungisele undofa wami.
“Ngemva kwalokho wangilaya ukuthi ngibuye lesikhwama esimnyama esingelalutho ngaqhatsha imota saya emangcwabeni eKhami siloHungwe, lapho-ke wenza amasalamusi akhe kwaphuma imali engange 1,3 miliyoni engama-pula lama-rands andubana athi ngimuphe i $1 000,” kulandisa uGade.
Uqhubekele phambili wathi ngenxa yokuthi imali eyayifunwa nguNyoni wayengalayo wehluleka ukumupha.
“I-$1 000 ngangingelayo kodwa ngamupha i $300 kwaphuma umuntu engcwabeni egqoke igawuni emhlophe owayekhuluma isinyanja uNyoni echasisa.
“Ngemva kwalokho sabuyela endlini kodwa kumele ngelanga elilandelayo siyethatha imali ngaqatsha njalo eyinye imota samlinda emavinkilini uNyoni kodwa kasabuyanga njalo locingo lwakhe kaluphindanga lwangena yikho sengidinga usizo ebantwini abamaziyo ngoba undofa ngimswele sengifuna imali yami,” kutsho uMnu Gade.
UMthunywa kenelisanga ukuxhumana lomsolwa ngoba engaziwa lapho atshona khona kuthi njalo lomngane wakhe ayehamba laye ucingo kalungeni.
Online Reporter