admin
YiNtatheli kaMthunywa
UMGADLI weLamontville Golden Arrows, uKnox “The Hitman” Mutizwa usehlohle amabhola amanengi kulabo bonke abadlali kuleliqembu.
UMutizwa, oleminyaka yokuzalwa engu-27, uzakhele udumo kumbali yaBafana Bes’thende.
Umgadli lo owavela kuqembu leHighlanders ufikise amabhola angu-40 ngesikhathi ehlohla ibhola elisize i-Arrows yanqoba nge-3-1 phezulu kweMarumo Gallants kumdlalo weDStv Premiership.
Ngokuhlohla kwakhe, uMutizwa udlule uMabhuti Khenyeza obebambe irekhodi yokuhlohla amabhola angu-39.
UKhenyeza ube ngomunye wabamjabulela kuqala uMutizwa.
“Usephindile uMutizwa. Siyambongela uKnox “The Hitman” Mutizwa ngokuba ngumtshayi wamabhola obehlule bonke eLamontville Golden Arrows njengoba esehlohle angu-40 sidlala leGallants.
“Ngokwenza lokhu useyedlule uMabhuti Khenyeza obephethe irekhodi ngamabhola angu-39,” kutsho umbiko we-Arrows ekhasini layo likaTwitter.
Ubuqhawe bukaMutizwa bubeke i-Arrows endaweni yesihlanu ku-logu njengoba iligi izakuma ngenxa yemidlalo yeFifa.
Emidlalweni eyisithupha yokuqala isizini entsha ivuliwe, i-Arrows iphumelele ukunqoba emibili, yadlala ngokulingana kwemithathu yasitshaywa kowodwa.
Kukhangelelwe okukhulu ku-Arrows nxa zibuya ekhefini. Izadibana leMamelodi Sundowns mhlaka 20 Mfumfu.
ISundowns iyakhokhela phambili ku-logu ngemiklomelo engu-16 njengoba lingekho iqembu eseliyehlule kuligi emidlalweni eyisithupha.
Online Reporter