admin
AMASELA enkomo emhlubulweni weMatabeleland, abesethwalise nzima abafuyi betshontsha inkomo, imbuzi labobabhemi ebusuku lemini, aze eqe umngcele ayetshontsha lelizweni lakweleBotswana.
Abafuyi bebekhala ezimathonsi kusukela eBeitbridge kuze kuyefika khonale eBulilima. Amasela la abesemile umsila njalo etshelelwa eceleni ukuthi ngeke enziwa lutho.
Bebethi bangatshontsha inkomo zabantu, nxa belandela umkhondo wazo babahlasele batshaywe abanye bahlahlelwe inyawo lezandla befela impahla ingeyabo, baze bacina betshaya lamapholisa ayehamba lezakhamizi belonda umzila.
Basebethethe umthetho bawufaka ezandleni zabo, besebefakela labantu abadinga izifuyo zabo imingcele ukuthi bangafiki kibo zihle zilobe izifuyo, kuthe sebetshaye izakhamizi lamapholisa mamo, babe sebezithezele olulenkume, kweza amapholisa amabhiza, abezinja lalabo ababizwa ngebizo lokuhlekisa elithiwa ngo-robayi ngoba bona bedume ngokutshaya umuntu aze akhulume langakubuzwanga.
Bangena amapholisa kuleyo ndawo abasebefakele abantu imingcele ngikhuluma kunjenje akudliwa esitshisayo, abanye babotshwa abanye baphunyuka batshaya inkotha badla lamanqe abaziwa lapho abakhona, kujuluka umsisila endodeni, abanye ngabahle babaleka lemuli zabo batshiya imizi ikhala ibhungayezi.
Ubuthutha babo amasela abalekileyo abazi ukuthi akula nto ebuhlungu njengokuhlala udingwa, uhlale ungobelethe inyawo. Ingani layo impala iyaxotshwa yizinja ize iphumule isisemawatheni. Manje wena muntu wenyama njengami uzagijima kuze kube nini, njalo sebeyizitha zikazulu lapho ababonwa khona ngumphakathi kuzatsheka ibhetshu endodeni umngcwado usale ulengile njengemamba ewothamele ilanga phezu kwesihlahla somviyo.
Kwathi ukungenela amapholisa kubetha umoya kwethuke wona amasela ngoba edingwa phansi phezulu. Ubusela benkomo lembuzi besekungathi yibhizimusi lapho abantu abavukela khona besiyadinga umsebenzi.
Zinengi izihlobo labangane abangasekho kulumhlaba emveni kokuthintithelwa izibaya zabo abanye ngabangenwa yimikhuhlane yenhliziyo, abanye njalo sebeyizilima befela inotho yabo, phela indoda yindoda ngesibaya sayo nxa uzamephuca kufanana lokuthi uyabe ufuna afe.
Asincedisaneni labomthetho azobanjwa amasela.
Ayixabene.
Umlobi ungamthinta ku: 0714355641.
Online Reporter