admin
Pumulani Mpofu
ABADALA bayaqinisa isaga esithi intandane enhle ngumakhothwa ngunina. Lokhu bakutsho ngoba benanzelela ukubana umntwana ukhula kuhle lapho egcinwa ngunina njalo izikhathi ezinengi obaba yibo abandise ukuqala ukubhubha abantwana basale begcinwa ngonina. Kulezinsuku izikhathi sezintshintshile njalo ukufa akusakhethi, omama sebevuka ubhova kube yibo abatshiya izingane zabo zilahliwe ezitaladeni kanye lemabholohweni. Inengi labantwana bahanjiswa kuSocial Services kanye lemapholiseni ukuze badingelwe lapho abangagcinwa khona.
Ezinye zendawo lapho okugcinwa khona abantwana zigoqela iPercy Ibboston, Emthunzini Wethemba Children’s Home kanye leSave Our Souls childrens village (SOS). Lezindawo yizo ezithathela abantwana incwadi zokuzalwa ngoba lezinhlanganiso yizo esezifana labazali balaba bantwana.
Kule iviki ngithole ithuba lokuxoxisana lejaha elileminyaka elitshumi lasikhombisa okuthiwa nguJohn Dube.
UJohn walahlwa ngunina elusane wadojwa ngamapholisa ayiwo amtholela indawo yokuhlala kweminye yemizi eqanjwe ngaphezulu. Wakhula wafunda kodwa kazange athathelwe incwadi yokuzalwa ngoba waphanga wathola abazali ababelesifiso sokumgcina bamkhulise njengowabo umntwana. Ekulungiseni kwezincwadi zokubana bamgcine eDistrict Social Services abazange baphiwe incwadi yakhe yokuzalwa. Wakhula uJohn esegcinwe yimuli yakoSibanda kwaze kwafika isibanga sokubana alobe isifundo semfundo yaphezulu kusigaba sesine (Form 4) kodwa-ke wehluleka ngoba engelayo incwadi yokuzalwa.
UJohn weza ke eTrinity ukuze aphathiseke ngokubana enzenjani ukuze athole incwadi yokuzalwa njengoba wayegcinwa ngabazali bakhe abakoSibanda. Okokuqala samlobela incwadi eya eDistrict Social Services njalo sabatshayela ucingo sibazisa ngodaba lukaJohn. Wahamba-ke lencwadi kugatsha lwe-District Social Services bafika-ke bakhangela kuma-computer ukubana ulwazi olumayelana lokudojwa kukaJohn lukhona yini. Emva kokuthola lolulwazi bamupha amaphepha okumele ayegcwaliswa e-Mthunzini Wethemba kanye lakudokotela eMpilo ukuze bazi ukubana uleminyaka emingaki bekhangela ngamazinyo akhe.
Emva kokugcwaliswa kwalawa maphepha kumele awase koMsitheli ukuze bamlungisele incwadi yakhe yokuzalwa njalo abe sethatha isithupha. Ngiloba nje izincwadi zakhe zikoMsitheli kodwa-ke bamazisa ukubana aze ngemva kwamaviki amabili. Emva kwamaviki amabili uzayithola incwadi yakhe yokuzalwa njalo lesithupha ukuze aye esikolo aqhubekele phambili ngezifundo zakhe .
Asihlanganeni njalo kuviki elizayo.
Umlobi utholakala kukheli ethi [email protected] loba kunombolo zocingo ezithi 0773195055.
Online Reporter