admin
YiNtatheli kaMthunywa
BABETHI kaselamsobho, yijesi engelamkhono bengazi ukuthi kukhulu okuzayo.
Le yiyo indaba kaSimon Munawa umgadli weqembu leHighlanders. Umdlali lo uqale isizini ka2016 ephambana lazo enkundleni kodwa ngemva kwemidlalo elitshumi usephenduke waba yisithandwa sabalandeli bomdlalo izwe lonke.
Bambalwa abadlali abakhanga amehlo abasekeli bamanye amaqembu, ngakho uMunawa ubalelwa kulabo asebehuge abasekeli abatsha kuBosso.
Emagumeni umdlali lo usephiwe amabizo amanengi, okuyisitshengiselo sokuthi bayamthanda. Abanye bamuthi nguYola, uMakanika kumbe uSayi. Amabizo la asekhulunywa nsukuzonke ngoba uManawa usehlohla kumidlalo yonke.
Umdlali lo, oleminyaka engu-29 yokuzalwa nguye yedwa ophatha iwisa leqembu, othi angagadla kuwe imvimbi zamanye amathimu. Kumidlalo yehlandla lakuqala uMunawa wenelise ukuthi adlale esemuva kodwa kwavela ukuthi wenelise ukugijima loba ngaphi.
Iphephandaba le-Sunday Mail lababaza umdlalo kaMunawa laze lamfanisa loPaul Scholes, umdlali owenza udumo ekuManchester United.
Ukuvuka kukaMunawa kuvuse labanye abadlali ababalisela uRahman Kutsanzira, uTendai Ngulube loGabriel Nyoni.
Ekhuluma loMthunywa, uMunawa uthe kazikhukhumezi ngoba umdlalo wakhe usekelwa yikudlala kuhle kwabanye abadlali kuBosso.
“Ngiyabonga ukuthi liyangibona ukuthi ngidlala kuhle. Lami kuyangimangalisa. Kungasi kudlala kuhle kweqembu aluba abasekeli bethu abakhulumi kanje njalo lami bengingeke ngikwenelise.”
Umdlali lo uthe akula enye ithimu angayidlalela. Umdlali lo kakaze anqobe inkezo yeligi lokhe wafika kuHighlanders, mhlawumbe kuliphupho angafuna ukuligcwalisa lonyaka.
“Ngakhulela kuBosso ngakho ngizaqedisa umdlalo wami ngikuqembu leli, ” kutsho lumdlali andubana ayehlangana labanye bakhe enkundleni yokulolonga ngoLwesithathu ekuseni.
UMunawa ukhangelelwe ukuthi abe yingxenye yeqembu elizadibana leNgezi Platinum kunkezo yeChibuku Super Cup ngeSonto.
Lo mqeqetshi uErol Akbay ulamazwi amahle ngalumdlalo.
“Udlala okujabulisayo labanye bakhe. Kuyathabisa lokhu,” nguAkbay lo ophume kuliviki ebika ukuthi umangele ngenguquko esivele kubadlali bakhe.
Online Reporter