Online Reporter
Zimpapers Sports Hub
AKUZANGE kube lombhobho owakhitshwa liqula leGwanda Pirates ngelanga kuvuka udlame emdlalweni walo leShabanie Mine, ngempelaviki edluleyo.
Amapholisa asekubeke emphakathini ukuthi okunengi obekukhulunywa ngabantu mayelana ngomdlalo lo bekungamanga, ikakhulu lokho obekukhulunywa ku-Social Media.
Umdlalo lo ubungoweligi yeZifa Central Region Division One. Obekubikwa ngamanga aluhlaza tshoko ukuthi umbhobho wakhitshwa ngumdlali weGwanda Pirates, uNewman Sianchali.
Isikhulumi samapholisa elizweni lonke, u-Commissioner Paul Nyathi ukuqinisekisile ukuthi akuzange kukhale umbhobho kodwa kwaba labantu abalimalayo.
“Akuzange kukhale umbhobho. Kodwa, kwalimala abantu ababili uSimbarashe Zifungo oleminyaka engu-36 yokuzalwa, loVictor Pachawo (39).
Enye inkokheli yeGwanda Pirates itshele iphephandaba likazulu ukuthi behlelwa liyezi elimnyama, kulimala abalandeli, kutshaywa izimota lezinye impahla zabo.
“Ibhola akumelanga libenje. Sahlaselwa njengenyamazana sikhangele. Sasihambe lamalunga emuli zethu, labo bakhuthwa ngamatshe lamambodlela ayejikwa.
“Izisebenzi zethu zatshaywa, kwajikijelwa izimota zethu. Bekuyimpi! Eqinisweni, iqembu leShabanie Mine lenza iphutha. Kayisiyo indlela yokuphatha umdlalo lezethekeli,” kutsho omunye wabakhokheli beGwanda Pirates, ngoLwesibili kuliviki.
Kulandela lokhu, inhlanganiso yeZimbabwe Football Association (Zifa) isikhiphe umbiko ngesehlakalo lesi.
“Siphatheke kabi kakhulu ngokwenzakeleyo.Imicabango yethu ikulabo abahlukumezekileyo lemideni yabo ngalesi sikhathi esinzima.
“Ibhola kumele libe yinto ehlanganisayo — lingalokothi libe yimbangela yokulimala, ukwesaba kumbe ukwehlukana. Okwenzakeleyo kuyakhathaza kakhulu futhi akwamukeleki,” kutsho i-Zifa.
Iqhubeke yathi: “IZifa iluthathela phezulu loludaba njalo isisungule uphenyo olugcweleyo njalo oluzimeleyo, ukuze kutholakale ukuthi yiziphi izimo ezidale ukuthi kube lokuhlasela. Ngakho-ke siqala leli inyathelo lokulungisa ngokuphangisa.”
Lenhlanganiso yeZifa Central Region Soccer League (CRSL) ikhiphe umbiko igcona udlame olwabakhona.
“Ukuziphatha okunje akufuneki kumdlalo wenguqu. Ukuphepha kwababukeli, abalandeli labadlali kuqakathekile.”
