Online Reporter
Sukulwenkosi Dube-Matutu
UMPHATHINTAMBO obona ngokwenzakala esabelweni seMatabeleland South u-Albert Nguluvhe uthe uHulumende uzimisele ukusebenzisana lobukhokheli bomdabu ukuze izwi lomphakathi lingasali kuzinhlelo zokuthuthukisa isabelo.
Ekhuluma ngeSonto emhlanganweni wenkokheli ezitshiyeneyo ezivela endaweni yenduna uMatibe eBeitbridge, uMphathintambo Nguluvhe ugcizelele izindaba eziqakathekileyo ezithinta umphakathi njalo wakhuthaza abakhokheli bomdabu ukuthi babambe indima enkulu ekuzilungiseni.
Kulumhlangano, bekulezisebenzi zekhansili kanye lezinye inkokheli zomphakathi.
Inhloso yalumhlangano ubuyikuqinisa ukuxhumana lokubambisana phakathi kobukhokheli besabelo lenkokheli zomdabuko.
Umhlangano lo uphinde wanika ithuba lokuxoxa ngezindaba zombuso wendawo, okumele kuqakathekiswe ekuthuthukisweni komphakathi kanye lezinkinga ezithinta umphakathi.
“Njengenkokheli zomdabu, sikhangelele ukuthi likhuthaze inhlonipho ebantwini kanye laphakathi kwenu njengenkokheli. Kuyadingakala njalo ukuthi njengenkokheli lisebenze ngokubambana.
Silabosobhuku, abalisa kanye lezinduna ezindaweni zethu ezitshiyeneyo.
“Lingasebenza ngokubambana kuyaba lengqubekelaphambili ezindaweni zenu lasemphakathini,” utsho njalo.
UMphathintambo Nguluvhe uphinde wakhuthaza abakhokheli ukuthi bathathe indawo yabo ekuvikeleni ukwendiswa kwabantwana abancane, okuqhubeka kulimaza amantombazana amancane kanye lokubuyisela intuthuko emuva.
Uphinde wanika inkokheli umsebenzi wokuthi bahambe phambili ekulwiseni ukusetshenziswa kwezidakamizwa okuluhlupho oluqhelayo kundawana zonke zelizwe.
