Online Reporter
Munyori weKwayedza
VANHU vanokwira mabhazi akazarisa vachadzikiswa uye obva atorwa senzira yekuderedza tsaona dzemumigwagwa panguva yezororo rino.
Chirongwa ichi chiri kutungamirirwa neTraffic Safety Council of Zimbabwe (TSCZ), iyo nguva yayo yekupa chenjedzo pamusoro pekudzivirira tsaona pazororo inotanga nemusi wa15 Zvita uye ichipera nemusi wa15 Ndira.
Pasi pechirongwa ichi, pachange paine mishina inoshandiswa kuongorora vatyairi mumigwagwa kuti havasi kutyaira vakadhakwa here.
Huwandu hwezvikwata zviri kushandira mumigwagwa hwakawedzerwa kuenda pa61 kubva 55 gore radarika.
Pazvikwata izvi, 34 zvinenge zvakamira munzvimbo dzakasiyana apo zvimwe 27 zvichange zvichifamba-famba, sekutaura kwamanaging director weTSCZ, VaMunesu Munodawafa.
Vanoti TSCZ iri kushanda nemapoka akasiyana-siyana, anosanganisira bazi rezvezvifambiso nemapurisa eZimbabwe Republic Police (ZRP) mukuona kuti mitemo yepamugwagwa yatevedzerwa nemazvo.
“Panenge paita nyaya yekutakura zvakadarikidza, vanhu vari kuzodzikiswa. Izvi hazvisi kuzoregwa kuitwa. Kunyangwe zvichikanganisa, tinofanirwa kutora matanho kuitira kuchengetedza upenyu. Ndiyo nzira yatiri kutora,” vanodaro.
