‘Mai mwana musandirove kani!’

‘Iwewe regedza kudanana nemunin’ina wangu’

MURUME samusha anoti akatama pamusha nekuda kwemudzimai wake uyo waanoti anogara achimuzvindikita kumurova nekuedza kumutema nedemo.Jefres Matimbe akamhan’arira mudzimai wake, Fungisai Masawi, kuHarare Civil Court achiti amushaisa rugare.

Akaudza mutongi wedare iri, Yeukai Dzuda, kuti: “Mambo wangu, kuroora kwandikona. Mukadzi uyu anondipfuvisa kugara nekugara nekuda kwemarovero aanondiita. Kutaura kuno ndakatotiza pamba nekuti akanga andirova akazondidzingirira nedemo achida kunditema.”

Matimbe akati mukadzi wake anomutevera kubasa kwake achimutadzisa kushanda zvakanaka.

“Dzimwe nguva paanondirova ndinotizira mumba asi anotema gonhi nematombo kunge richapazika achida kuti ndibude. Anondituka nemashoko anotyisa uye anouya kubasa kwangu achinditadzisa kushanda,” akadaro.

Achipawo divi rake, Masawi akati haarove murume wake asi kuti iye ndiye anotorohwa.

“Pane zvaataura zvose hapana chechokwadi, iye ndiye ane tsika yekundirova, kunditandanisa pamba pangu nedemo uye kudanana nemunin’ina wangu. Zvaari kutaura zvekutiza pamba, inyaya yekuti ndakavawanikidza vachishinha nemunin’ina wangu zvichitevera kufonerwa kwandainge ndaitwa nemuvakidzani wangu ndiri kumusha,” akadaro.

Anoti mushure mekubatikidza murume wake aine munin’ina wake, vakazotaurirana akavimbisa kuti achamuripa nekumutengera midziyo yemumba.

“Takazotaurirana akandikumbira ruregerero achiti achanditengera midziyo yemumba, ini ndokumuregerera. Uye akapisa hembe dzangu ndikanomhan’ara kumapurisa vakati titaurirane ndokundikumbira ruregerero zvakare,” akadaro Masawi.

Mutongi Dzuda akapa Matimbe gwaro redziviriro.